Myńnan astam azamat ınsýlt qaýpin erte anyqtaý boıynsha tekserýden ótti
ASTANA.KAZINFORM - Densaýlyq saqtaý mınıstrligi mı qan aınalymynyń buzylystaryn erte anyqtaýǵa baǵyttalǵan jańa baǵdarlamalardy engizý nátıjeleri týraly habarlady.
2026 jyldyń basynan bastap 50 jastan asqan 82 myńnan astam er azamat brahıotsefaldyq tamyrlardy ýltradybystyq zertteý arqyly tekserýden ótti.
Zertteý qorytyndysy boıynsha shamamen 5 myń adamda (6%) bas jáne moıyn tamyrlarynyń stenozy anyqtaldy. Bul – ınsýlttiń negizgi qaýip belgileriniń biri. Atalǵan patologııany der kezinde anyqtaý aýyr asqynýlardyń aldyn alýǵa, patsıentterdiń ómiri men densaýlyǵyn saqtaýǵa múmkindik beredi.
Qazirgi ýaqytta patsıentterdiń 72,7%-y angıohırýrgtiń konsýltatsııasyn alǵan. Bul kadrlyq áleýetti odan ári kúsheıtý jáne mamandandyrylǵan kómektiń qoljetimdiligin arttyrý qajettigin kórsetedi.
Baǵdarlamany iske qosý demografııalyq jáne minez-qulyq faktorlarymen baılanysty. Qazaqstanda erler men áıelderdiń arasyndaǵy ómir súrý uzaqtyǵynyń aıyrmasy 8 jyldan asady. Bul kóbinese erler arasynda qaýip faktorlarynyń – temeki shegý, tómen fızıkalyq belsendilik jáne basqa da faktorlardyń joǵary taralýymen baılanysty.
2026 jylǵy qańtardan bastap er azamattardyń arasynda tserebrovaskýlıarlyq buzylystardy erte anyqtaýǵa arnalǵan zertteý ár 2 jyl saıyn júıeli negizde júrgiziletinin eske sala keteıik.
Sonymen qatar Densaýlyq saqtaý mınıstrligi tegin medıtsınalyq kómektiń kepildik berilgen kólemi (TMKKK) sheńberinde profılaktıkalyq baǵdarlamalardy jańǵyrtty.
Atap aıtqanda:
• dáleldengen tıimdiligi bar zertteýler engizildi (tómen tyǵyzdyqtaǵy lıpoproteıdter, trıglıtserıdter, glıkırlengen gemoglobın);
• beıindi mamandardyń negizsiz konsýltatsııalaryn alyp tastaý arqyly patsıentterdi baǵyttaý marshrýttary ońtaılandyryldy;
• meıirgerlerdiń ókilettikteri keńeıtildi, onyń ishinde aýytqýlar bolmaǵan jaǵdaıda tekserýdi aıaqtaý múmkindigi berildi;
• zertteýden ótetin azamattardyń jas shegi 76 jasqa deıin ulǵaıtyldy.
Іske asyrylyp jatqan sharalar densaýlyq saqtaý júıesiniń profılaktıkalyq baǵytyn kúsheıtýge, aýrýlardy erte anyqtaýǵa jáne júrek-qantamyr jáne tserebrovaskýlıarlyq aýrýlardan bolatyn ólimdi tómendetýge baǵyttalǵan.
2025 jyldyń qorytyndysy boıynsha emdelgen patsıentterdiń sany 8,3%-ǵa artyp (49 myńnan 53 myńǵa deıin), trombolızıs júrgizý úlesi 11%-ǵa ósti, ınsýltten bolatyn ólim 4%-ǵa tómendedi.
Qazirgi ýaqytta ınsýltter qanaınalym júıesiniń aýrýlarynan bolatyn jalpy ólim qurylymynyń 32%-y.
Júrgizilip jatqan sharalardyń nátıjesinde 2026 jyldyń alǵashqy eki aıynda qanaınalym júıesi aýrýlarynan bolatyn jalpy ólim 16,3%-ǵa tómendedi.
Buǵan deıin aýylǵa baratyn dárigerlerge qandaı qoldaý tetikteri qarastyrylǵanyn jazǵan bolatynbyz.
