Mınıstrliktiń jumys toby Jambyl oblysynyń mektepterine ádistemelik kómek kórsetip jatyr
ASTANA. KAZINFORM – Oqý-aǵartý mınıstriniń tapsyrmasyna sáıkes 22–26 qyrkúıek aralyǵynda Jambyl oblysynda bala quqyqtaryn qorǵaý salasynda ádistemelik kómek kórsetý jónindegi jumys toby qyzmet atqaryp jatyr.
Jańa oqý jylynyń basynda óńirde bolǵan qaıǵyly jaǵdaılarǵa baılanysty uıymdastyrylǵan bul jumys pedagogterge qoldaý kórsetýge, balalardyń qaýipsizdigi men ál-aýqatyn qamtamasyz etýge baǵyttalǵan. Sondaı-aq, quqyqbuzýshylyqtyń sebepterin anyqtaý jáne ata-analarǵa jeke keńester men túsindirý jumystary arqyly kómek kórsetý mindeti kózdelgen.
— Jumys toby Balalardyń quqyqtaryn qorǵaý komıtetiniń jetekshiligimen qurylyp, bes shaǵyn topqa bólingen 25 mamannan turady. Quramyna bilim berý sapasyn qamtamasyz etý jónindegi aýmaqtyq departament ókilderi, óńirlik bala quqyqtary jónindegi ýákil, «Órken» balalardyń ál-aýqaty arttyrý ınstıtýtynyń sarapshylary, «Órleý» biliktilikti arttyrý ulttyq ortalyǵynyń mamandary, Y. Altynsarın atyndaǵy Ulttyq bilim akademııasynyń ǵalymdary, psıhologııalyq qoldaý ortalyqtarynyń dırektorlary men tájirıbeli sarapshylar enedi, — delingen habarlamada.
Mamandar Taraz qalasy men oblys aýdandaryndaǵy mektepterde bolyp, pedagogtermen, oqýshylarmen jáne ata-analarmen kezdesýler ótkizip, áleýmettik-psıhologııalyq ahýaldy zerdeleýde. Sondaı-aq mektep dırektorlary, olardyń tárbıe isi jónindegi orynbasarlary, pedagog-psıhologtar men áleýmettik pedagogterge býllıngtiń aldyn alý, destrýktıvti minez-qulyqty anyqtaý, ata-analarmen tıimdi ózara is-qımyl jasaý jáne psıhologııalyq-pedagogıkalyq qoldaýdyń sapasyn arttyrý máseleleri boıynsha semınarlar ótkizilip jatyr.
Mınıstrdiń tapsyrmasyna sáıkes atalǵan jumys uzaq merzimdi ádistemelik qoldaý formatynda jalǵasady. Іs-sharalar respýblıkalyq «DosbolLIKE» antıbýllıng baǵdarlamasymen jáne «Adal azamat» biryńǵaı tárbıe baǵdarlamasymen ıntegratsııalanady.
Aıta ketelik Tarazdaǵy mektep-ınternatta qyz balany qorlaǵan sát kameraǵa túsip qalǵan edi. Sondaı-aq sońǵy eki aptada úsh qaıǵyly oqıǵaǵa baılanysty Taraz jáne Shý ákimderine sógis berilgen edi. Sonymen qatar 23 qyrkúıek kúni 14 jastaǵy mektep oqýshysy ózine qol jumsady.