Mınıstrlikter jańa jumys kestesine kóshe bastady

ASTANA. KAZINFORM — Ekologııa jáne tabıǵı resýrstar mınıstrliginiń jumys ýaqyty ózgerdi, dep habarlaıdy vedomstvonyń baspasóz qyzmeti.

Mınıstrlik 2025 jylǵy 18 sáýirden bastap jumys ýaqyty saǵat 08:00–den 17:30–ǵa deıin ózgeretindigin habarlady.

— QR Eńbek kodeksiniń 46-babyna sáıkes Ekologııa jáne tabıǵı resýrstar mınıstrliginde, onyń vedomstvolary men olardyń aýmaqtyq qurylymdarynda jumys ýaqytynyń rejımi ózgergeni týraly habarlaımyz. Saǵat 13.00-14.30 arasynda demalysqa jáne tamaqtanýǵa úzilis beriledi, jumys kúni saǵat 08.00-de bastalyp, saǵat 17.30-da aıaqtalady. Osyǵan baılanysty, barlyq qyzmet kórsetýshilerdi jańartylǵan jumys kestesine kóshýge jáne qabyldaýdy jańa grafıkke sáıkes qatań túrde júrgizýge shaqyramyz, — delingen vedomstvo taratqan aqparatta.

Eske salsaq, buǵan deıin Katonqaraǵaı aýdanynda jumys ýaqyty bir saǵatqa keri shegerilgeni habarlanǵan.

Keıin taǵy birneshe aýdanda jumys ýaqyty ózgertildi.

12 naýryz kúni Altaı jáne Ulan aýdandarynda da jumys ýaqyty saǵat 08.00-de bastalatyndyǵy týraly jazǵanbyz.

Sonymen qosa, Shyǵys Qazaqstan oblysyndaǵy Glýbokoe jáne Shemonaıha aýdandarynda jumys ýaqyty bir saǵatqa shegerildi.

Aıta keteıik, ǵalymdar ýaqyt beldeýin ózgertýdiń keri áserin dáleldese, kim jaýapty bolatynyn jazǵanbyz.