Mınıstrlikke seısmıkalyq qaýiptilikke baǵalaý júrgizý ókilettigi beriledi - Shyńǵys Árinov

ASTANA. KAZINFORM – Tótenshe jaǵdaılar mınıstrligine seısmıkalyq, sel jáne kóshkin qaýipsizdigin qamtamasyz etýde qala qurylysy jobalaryn kelisý boıynsha fýnktsııa beriledi. Bul týraly Májilistiń jalpy otyrysynda azamattyq qorǵaý týraly zań jobasyn talqylaý kezinde atalǵan vedomstvonyń basshysy Shyńǵys Árinov málim etti.

- Seısmıkalyq aımaqtaǵy halyqtyń qaýipsizdigin qamtamasyz etý úshin jańa júıeli tásilder engizilýde. Memlekettiń, sharýashylyq júrgizý sýbektileriniń jáne halyqtyń ózara qarym-qatynasyn retteıtin seısmıkalyq qaýipsizdikti qamtamasyz etý jónindegi is-sharalar jeke taraý retinde engiziledi. Atap aıtqanda, mınıstrlik pen jergilikti atqarýshy organdarǵa seısmıkalyq qaýiptilikke baǵalaý júrgizý ókilettigi beriledi. Munda halyqty qorǵaý jónindegi is-sharalar eskerilgen, - dedi Sh. Árinov.

Sonymen qatar mınıstrlikke seısmıkalyq, sel jáne kóshkin qaýipsizdigin qamtamasyz etýde qala qurylysy jobalaryn kelisý boıynsha fýnktsııa beriledi.

- Jalpy, Memleket basshysynyń tapsyrmasy boıynsha qurylǵan Tótenshe jaǵdaılardyń aldyn alý komıtetine ortalyq memlekettik jáne jergilikti atqarýshy organdarǵa qatysty tótenshe jaǵdaılardyń aldyn alý jónindegi baqylaý fýnktsııalary beriledi. Azamattyq qorǵanys boıynsha jekelegen normalar kózdelgen. Qazirgi ýaqytta azamattyq qorǵanystyń qorǵanysh qurylystarynyń bir bóligi jeke menshikte. Ony paıdalanýdy jeke menshik ıeleri ózderi basqarady. Olardy esepke alý tártibin belgileý úshin quqyqtyq kadastrda jeke jyljymaıtyn múlik obektisi retinde qurylystardy tirkeý engiziledi. Sondaı-aq, «eń qarapaıym jasyryn panalar» degen jańa uǵym engizilip otyr. Bul halyqty qorǵaý maqsatynda arnaıy jabdyqtalǵan jerasty parkıngteri men jertóleler, - dedi mınıstr.

Eske salsaq, Almatyda 10 916 nysanǵa seısmıkalyq aýdıt júrgizildi.