Mınıstrlik jemqorlyq daýyna ushyraǵan kompanııa úleskeriniń «QazAvtojol» basshylyǵyna qalaı kelgenin túsindirdi
«QazAvtojol» ulttyq kompanııasynyń basqarma tóraǵasy Meıirhat Qasymbaevtyń Shyǵys Qazaqstan oblysyndaǵy jol qurylysyna bólingen 21 mlrd teńgeniń bir bóligin masattan tys paıdalanǵan «QazGerStroı» kompanııasynyń úleskeri bolǵany týraly málimet taraǵan bolatyn. Kólik mınıstrligi osy jaǵdaıǵa baılanysty túsinikteme berdi, dep habarlaıdy QazAqparat tilshisi.
Omby-Maıqapshaǵaı halyqaralyq jolynyń bir bóligindegi jemqorlyq faktisi týraly jýrnalıstik zertteýde «QazAvtoJol» ulttyq kompanııasynyń basqarma tóraǵasy Meıirhat Qasymbaevtyń jobaǵa bólingen 21 mlrd teńgeniń bir bóligin maqsatsyz paıdalanyp jatqan kezde «KazGerStroı» kompanııasyna úlesker bolǵany aıtylǵan.
Kólik mınıstrliginiń atalǵan maqaladaǵy derekter týraly QazAqparat tilshisiniń saýalyna bergen jaýabynda Meıirhat Qasymbaev ulttyq kompanııa basshylyǵyna kelerden buryn tiısti tekserýden ótkeni aıtylǵan.
«Meıirhat Qasymbaevty taǵaıyndaýǵa qatysty «QazAvtoJol» UK» AQ Basqarma tóraǵasy laýazymyna taǵaıyndalǵanǵa deıin usynylǵan qujattarda barlyq qajetti tekserý rásimderi júrgizildi jáne kvazımemlekettik sektorǵa jumysqa qabyldaý úshin qandaı da bir shekteýler bolǵan joq», - delingen jaýapta.
Mınıstrlik mamandary atalǵan jobanyń qazirgi ahýaly týraly da málimet keltirgen.
«Qalbataý-Maıqapshaǵaı» ýchaskesin rekonstrýktsııalaýǵa kelisimshart «China Xinxing Corporation»/«QazGerStroı» BK» JShS konsortsıýmymen jasaldy. Bul rette «China Xinxing Corporation» konsortsıým kóshbasshysy rólin atqardy. Kelisimshart talaptaryna sáıkes, konsortsıýmnyń jetekshisi «China Xinxing Corporation» kompanııasyna bank kepildigimen avans berildi. Konsortsıým jetekshisi usynylǵan banktik kepildikke sáıkes «QazGerStroı» BK» JShS-ine avans tóledi. Jobany júzege asyrý barysynda «QazGerStroı» BK» JShS joba boıynsha jumystardy tıisti túrde júrgizbedi, jumystardy júrgizý kestelerinen keshiktirip otyrdy. Tıisinshe Konsortsıým jetekshileri «QazGerStroı» BK» JShS-men konsortsıýmdyq kelisimdi buzý týraly sheshim qabyldady», - dep jazylǵan mınıstrlik málimetinde.
Osylaısha, byltyr qazaqstandyq merdiger konsortsıýmnan shyǵarylǵan kórinedi.
«Qurylys jumystaryn óz kúshimen aıaqtaýǵa qytaılyq «China XinXing Corporation» kompanııasy mindetteme aldy. Tólenip, óńdelmeı qalǵan avansqa keletin bolsaq, qazirgi ýaqytta Sybaılas jemqorlyqqa qarsy qyzmet «Qalbataý-Maıqapshaǵaı» avtojolynyń ýchaskesin qaıta jańartý jónindegi shart sheńberinde «China Xinxing Corporation» kompanııasynan alynǵan avansty «QazGerStroı» BK» JShS negizsiz paıdalaný faktisi boıynsha qylmystyq isti tergep jatyr. Aıta ketý kerek, atalǵan jeke kompanııalardyń is-áreketteri olardyń ishki qarjylyq sharýashylyq qyzmetine jatady, oǵan QR Kólik mınıstrligi Avtomobıl joldary komıtetiniń qatysy joq. Budan bólek, «QazGerStroı» BK» JShS-niń «QazAvtoJol» UK» AQ aldynda qaryzy joq jáne onymen sharttyq qatynastarda emes ekenin atap ótý mańyzdy», - delingen jaýapta.
