Mınıstrlik Jambyl oblysyndaǵy perınataldyq ortalyqty jańǵyrtý qajettigin aıtty
ASTANA. KAZINFORM – QR Densaýlyq saqtaý mınıstrliginiń jetekshi mamandary Jambyl oblysyna akýsherlik, gınekologııa jáne klınıkalyq epıdemıologııa qyzmetterine ádistemelik ári praktıkalyq kómek kórsetý maqsatynda jumys saparymen bardy.
Sarapshylar tobynyń quramyna UMC Ana men bala ulttyq ǵylymı ortalyǵynyń, Ulttyq akýsherlik, gınekologııa jáne perınatologııa ǵylymı ortalyǵynyń, Ulttyq qoǵamdyq densaýlyq saqtaý ortalyǵynyń, sondaı-aq Almaty men Shymkent qalalaryndaǵy jetekshi bosandyrý uıymdarynyń akýsher-gınekologtary, anestezıolog-reanımatologtary men epıdemıologtary kirdi.
- Úsh kúndik jumys barysynda mamandar 14 medıtsınalyq uıymǵa bardy. Onyń ishinde oblys ortalyǵyndaǵy tórt statsıonar, bes qalalyq emhana, Shý, Talas, Sarysý, Baızaq jáne Turar Rysqulov aýdandaryndaǵy bes ortalyq aýdandyq aýrýhana, sondaı-aq Taraz qalasyndaǵy medıtsınalyq kolledj qamtyldy.
Sapar barysynda júkti áıelderge, bosanatyn áıelderge jáne jańa týǵan nárestelerge kórsetiletin medıtsınalyq kómekti jetildirýge baǵyttalǵan keshendi sharalar ótkizildi, - delingen Densaýlyq saqtaý mınıstrliginiń aqparatynda.
Mamandar klınıkalyq tekserýler júrgizip, patsıentterge konsýltatsııalyq kómek kórsetti, dárigerlerge praktıkalyq qoldaý bildirdi. Sonymen qatar kúrdeli klınıkalyq jaǵdaılardy taldap, jumys oryndarynda sheberlik saǵattaryn ótkizip, óńirlik mamandarmen tájirıbe almasty.
Akýsherlik jáne klınıkalyq epıdemıologııa salasyndaǵy zamanaýı tásilderge arnalǵan oqytý semınarlaryna Jambyl oblysynyń 140-tan astam medıtsına qyzmetkeri qatysty.
Jumys qorytyndysy boıynsha óńirdegi medıtsınalyq uıymdardyń basshylarymen keńes ótkizildi. QR Densaýlyq saqtaý mınıstrliginiń Ana men bala densaýlyǵyn saqtaý departamentiniń dırektory Maǵrıpa Embergenova men oblystyq densaýlyq saqtaý basqarmasynyń basshysy Serjan Nazarbek oblystyq perınataldyq ortalyqty jańǵyrtý jáne kadrlyq áleýetti kúsheıtý qajettigin atap ótti.
Sapar aıasynda aýyr jaǵdaıdaǵy patsıentterge praktıkalyq kómek kórsetýge de erekshe kóńil bólindi. Eldiń jetekshi reanımatologtary óńirlik mamandarmen birlesip naýqastarǵa konsýltatsııa berip, ári qaraı emdeý tásilderin aıqyndady.
Sarapshylar júkti áıelderdegi qaýip faktorlaryn ýaqytyly anyqtaý, patsıentterdi tıimdi baǵyttaý jáne ana men bala densaýlyǵyn saqtaý úshin pánaralyq baılanysty kúsheıtý boıynsha usynystar berdi.
Aıta keteıik, 2027 jylǵa arnalǵan dári-dármek satyp alý naýqany úsh aı erte bastaldy.
