Mınıstrlik zeınetaqy jınaǵyn alýǵa qatysty ózgeristerdiń sebebin túsindirdi
ASTANA. KAZINFORM — Eńbek jáne halyqty áleýmettik qorǵaý mınıstrligi zeınetaqy jınaqtarynyń bir bóligin merziminen buryn alýǵa arnalǵan eń tómengi jetkiliktilik shegin aıqyndaý ádistemesin qaıta qaraý sebepterin túsindirdi.
Aldaǵy ózgeristerdiń negizgi maqsaty — azamattardyń qarjylyq turaqtylyǵyn qamtamasyz etip, qarttyq kezeńde laıyqty tólemder alýyna kepildik berý.
— Zeınetaqy jınaqtary eń aldymen adam zeınetke shyqqannan keıingi turaqty tabys kózi bolýy tıis. Bul qarajatty kez kelgen ýaqytta alyp jumsaıtyn depozıt retinde qarastyrýǵa bolmaıdy. Ásirese, bolashaq zeınetaqysy memleketten tólenetin bazalyq tólem men ózderiniń jınaqtaryna negizdeletin jas qazaqstandyqtar úshin bul qarjyny saqtaý asa mańyzdy, — delingen mınıstrlik habarlamasynda.
Qazirgi qoldanystaǵy ádisteme jınaqtyń jetkiliktilik sheginen asatyn bóligin alýǵa múmkindik beredi. Alaıda ol kóbine «minsiz» stsenarııge negizdelgen: ıaǵnı azamat turaqty túrde mindetti zeınetaqy jarnalaryn aýdaryp, zeınet jasyna deıin qajetti somany jınaıdy dep boljanady. Al ómirde kezdesetin jaǵdaılar, mysaly, turaqty tabystyń bolmaýy nemese jumyssyzdyq kezeńderi eskerilmeıdi.
— Sońǵy úsh jyl ishinde eń tómengi jetkiliktilik shegi qaıta qaralmaǵany da túzetýler engizýge negiz boldy.
Osyǵan baılanysty mınıstrlik ekonomıkalyq turǵydan negizdelgen (aktýarlyq) tásilge súıengen jańa esepteý ádistemesine kóship jatyr. Endi esepteýler kútiletin ómir súrý uzaqtyǵyn, ınvestıtsııalyq tabystylyqty jáne bolashaq tólemderdiń maqsatty deńgeıin eskeretin bolady, — delingen habarlamada.
Mysal retinde: 46 jastaǵy salymshynyń shotynda 11 mln teńge bar delik. Onyń jasyna sáıkes jetkiliktilik shegi — 7,8 mln teńge, ıaǵnı qazirgi jaǵdaıda ol 3,2 mln teńgeni sheship ala alady.
— Eger osy somany sheship alsa, bolashaqta Biryńǵaı jınaqtaýshy zeınetaqy qorynan alatyn aı saıynǵy tólemi eń tómengi deńgeıde qalyptasady (qazirgi esep boıynsha — eń tómengi kúnkóris deńgeıiniń 70%-y nemese shamamen 35,6 myń teńge). Al eger jınaqtaǵy qarajatty almaı, saqtap qalsa, bolashaqtaǵy zeınetaqysy shamamen 2–2,5 ese joǵary bolýy múmkin.
Jańa ózgeristerdiń negizgi máni azamat búgin jınaqtyń bir bóligin paıdalanǵan kúnniń ózinde, erteń laıyqty zeınetaqy alýǵa jetkilikti qarajattyń saqtalýyn qamtamasyz etý. Memleket azamattardyń uzaq merzimdi múddelerin qorǵaýdy jalǵastyryp, árbir qazaqstandyqtyń qartaıǵanda qarjylyq turǵydan senimdi bolýyna jaǵdaı jasaýdy kózdeıdi, — delingen habarlamada.
Aıta ketelik bıyl zeınetaqy qaıta kóterilmeıtini týraly jazǵan edik.
