Mınıstrlik zańgerler daıarlaıtyn JOO-lar týraly: tek myqtylary ǵana qalady

ASTANA. KAZINFORM – Ǵylym jáne joǵary bilim mınıstriligi Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenova zańgerler daıarlaıtyn JOO-lardy qysqartýǵa qatysty pikir aıtty.

- Keıingi jyldary elimizde zańgerlerdi daıyndaıtyn joǵary oqý oryndarynyń sany 72-den 59-ǵa deıin qysqardy. Zań fakýltetterine qoıylatyn talaptar kúsheıtildi. Tıisti oqytýshylar quramy, materıaldyq-tehnıkalyq baza, kitaphanalar, praktıkalyq oqý bazasy boıynsha jáne basqa da talaptar orıyndalýy kerek. Qazir bul baǵytta jumys jalǵasyp jatyr, básekege tótep bere almaıtyn barlyq ýnıversıtetter kadr daıyndaı almaıdy. Qazir ýnıversıtetter akademııalyq erkindikke ıe bolǵan kezde jáne olar ózderi jumys berýshilermen birge standarttardy ázirlep jatqanyn eskersek, básekelestik joǵary, - dedi G. Kóbenova Senatta zań bilimin damytý taqyrybyna arnalǵan parlamenttik tyńdaýdan keıingi brıfıngide. 

Osy oraıla ol mınıstrlik JOO-lar sanyn belgili bir mejege deıin qysqartýdy maqsat etpeıtinin aıtty. 

- Árbir talapker zańger mamandyǵyna túse almaıdy. Birinshi shart – UBT-da 75 bal jınaý kerek, ıaǵnı daıyndyǵy bar jastar túse alady. Olar jumysqa ornalasý úshin bilim sapasy joǵary ýnıversıtetterdi tańdaýǵa tyrysady. Osyndaı ádil báseke bolǵan kezde, tek jaqsy bilim beretin ýnıversıtetter ǵana jumysyn jalǵastyrady, - dedi komıtet basshysy.

Budan buryn habarlanǵandaı, Senat tóraǵasy Máýlen Áshimbaev zańgerler daıarlaý isinde qordalanǵan problemalar bar ekenin aıtty. 

Ǵylym jáne joǵary bilim mınıstri Saıasat Nurbek búginde zańger mamandyǵy boıynsha joǵary bilim alyp jatqan jastardyń 97 paıyzy aqyly negizde oqıtynyn aıtty.