Mınıstrlik ýaqyt beldeýin qaıtarýdy talap etken petıtsııany oryndaýdan bas tartpaqshy
ASTANA. KAZINFORM — Ýaqyt beldeýin burynǵy rejımge qaıtarý týraly petıtsııany talqylaý kezinde Saýda jáne ıntegratsııa vıtse-mınıstri Qaırat Balyqbaev jaýapty memlekettik organnyń aldyn ala sheshimin jarııalady.
2 saǵattan astam ýaqytqa sozylǵan jıynda eki tarap ortaq sheshimge kele almady.
Otyrystyń tóraǵasy retinde sóz alǵan Qaırat Balyqbaev petıtsııa talabyna baılanysty sheshim jobasyn jarııalady.
Degenmen ol bul aıtylǵan sheshim tek jospar ǵana ekenin, naqty sheshim emestigin eskertti.
«Men aldyn ala sheshimdi aıtaıyn dep otyrmyn. Ýaqyt beldeýin burynǵy qalpyna qaıtarý týraly petıtsııa ókilderiniń ýájderin talqylaı kelip, ol talapty oryndaýdan bas tartý jóninde sheshim qabyldaýǵa bekinip otyrmyz. Men búgingi jıynnyń tóraǵasy retinde osy 1,5 aı ishinde sizder atqarǵan búkil jumystyń qorytyndysy boıynsha ótinim berýshiler keltirgen ýájderdiń eshbirin dáleldeıtin faktiler tabylǵan joq. Ýaqyt beldeýiniń ózgerýi azamattardyń densaýlyǵyna da, elektr qýatyn tutyný shyǵyndaryna da áser etken joq», — dedi vıtse-mınıstr.
