Mınıstrlik týrızm salasyna arnalǵan tsıfrlyq statıstıka júıesin engizbek
ASTANA.KAZINFORM — Týrızm jáne sport mınıstrligi 2026 jyldan bastap uıaly derekter negizinde tsıfrlyq statıstıkaǵa kóshedi.
Týrızm jáne sport mınıstrligi Strategııalyq josparlaý jáne reformalar agenttigine qarasty Ulttyq statıstıka bıýrosymen birlesip, ishki jáne kelý týrızmi boıynsha statıstıkalyq derekter jınaý júıesin jetildirý máselesine arnalǵan jumys kezdesýin ótkizdi. Jıynda baılanys operatorlarynan alynatyn aqparatty paıdalana otyryp, statıstıka júrgizýdiń jańa tásilderi talqylandy.
Kezdesý barysynda uıaly baılanys operatorlarynyń derekteri negizinde daıyndalǵan 2024 jylǵy ishki týrıster týraly aldyn ala taldaý nátıjeleri usynyldy. Qatysýshylar otandyq saıahatshylar men týrısterdi sapar uzaqtyǵyna jáne túnegen-túnemegenine qaraı jikteý tásilderi, sondaı-aq qalyptasqan kórsetkishterdiń ashyqtyǵy men shynaıylyǵyn qamtamasyz etýge qajetti ádistemelik ólshemderdi talqylady.
— Uıaly baılanys operatorlarynyń derekterin paıdalaný týrısterdiń naqty sanyn anyqtaýǵa múmkindik beredi. Bul bir kúndik jáne túnegen nemese túnemegen saparlardy da qamtıdy. Buryn mundaı málimetter dástúrli statıstıkada eskerilmeıtin. Osy arqyly el aýmaǵyndaǵy týrıstik belsendilik jan-jaqty ári obektıvti túrde kórsetiledi.
Statıstıkalyq esep júrgizý ádistemesin jańartý qajettiligi qoldanystaǵy esep júıesindegi olqylyqtardan týyndap otyr. Máselen, 2024 jyly Qazaqstanǵa 15,3 mıllıon sheteldik týrıst kelgen, onyń ishinde 10,4 mıllıony el aýmaǵynda bir kúnnen kóp bolǵan. Alaıda olardyń shamamen 9 mıllıony ornalastyrý oryndarynda tirkelmegen, al bul nysandar resmı statıstıkanyń negizgi derekkózi sanalady. Mundaı jaǵdaı tsıfrlyq quraldar men jańa derekkózder arqyly esep júrgizý tásilderin keńeıtý qajettigin aıqyn kórsetedi, — delingen mınıstrlik habarlamasynda.
Halyqaralyq tájirıbege sáıkes, týrızm statıstıkasynda uıaly baılanys derekterin qoldaný — eń tıimdi ádisterdiń biri. Mundaı tájirıbe qazirgi tańda Indonezııa, Oman, Estonııa jáne Saýd Arabııasy sııaqty elderde keńinen qoldanylady.
2026 jyldan bastap ishki jáne kelý týrızmi boıynsha uıaly baılanys operatorlarynyń derekterine negizdelgen eksperımenttik statıstıkalyq málimetterdi jarııalaý josparlanyp otyr. Bul, óz kezeginde, ınfraqurylymdy damytýǵa, ınvestıtsııa tartýǵa jáne týrısterge kórsetiletin qyzmet sapasyn jaqsartýǵa qajetti shynaıy týrıstik aǵyn týraly aqparat alýǵa múmkindik beredi.
Aıta ketelik Qytaıdan Qazaqstanǵa kelgen týrıster sany 78% kóbeıgeni týraly jazǵan edik.