Mınıstrlik tasqyn týraly 28 aqparatty jalǵan jáne qate dep tanyǵan
ASTANA. KAZINFORM – Mádenıet jáne aqparat mınıstrligi tasqyn týraly 28 aqparatty jalǵan jáne qate dep tanyǵan. Ortalyq kommýnıkatsııalar qyzmetinde ótken brıfıngte vıtse-mınıstr Qanat Ysqaqov osyndaı derek keltirdi.
«Ókinishke qaraı, sońǵy kezde aqparattyq jelilerde, keıbir buqaralyq aqparat quraldarynda nemese paraqshalarynda jalǵan, feık aqparattardyń taratylýyn kórip otyrmyz», - dedi vıtse-mınıstr.
Sondaı-aq, tirkelgen faktileriń sanyn atap, mysal keltirdi.
«Qazirgi tańda aqparat alańyna jasalǵan monıtorıng kezinde 28 jalǵan jáne qate aqparat taraǵany belgili boldy. Onyń bári ýákiletti ortalyq jáne jergilikti atqarýshy organdar teriske shyǵardy. Kóbinese respýblıkalyq jáne jergilikti mańyzdaǵy joldardyń, sý qoımalary men elektr stansalarynyń, ózge de strategııalyq nysandardyń apaty, aýyzsýdyń búlingeni, evakýatsııa oryndary týraly qate aqparat jıi taraıdy. Mysaly, Aqtóbede sýmen jabdyqtaý toqtap qalǵany jáne sý qoımasynyń shlıýzderin ashý týraly áleýmettik jelide taraǵan málimetterdi Aqtóbe oblysynyń ákimdigi der kezinde teriske shyǵardy», - dedi ol.
