Mınıstrlik talapkerlerge granttar týraly mańyzdy aqparat jarııalady
ASTANA. KAZINFORM – Ǵylym jáne joǵary bilim mınıstrligi 2025–2026 oqý jylyna elimizdiń joǵary oqý oryndaryna qujat qabyldaýdy bastady.
2025 jylǵy 13-20 shilde aralyǵynda talapkerlerden bilim berý granttary konkýrsyna, sondaı-aq aqyly negizde oqýǵa ótinishter qabyldanady. Qujattardy egov.kz portaly arqyly onlaın nemese ýnıversıtetter janyndaǵy qabyldaý ortalyqtary arqyly tapsyrýǵa bolady.
UBT shekti balldary
Bilim berý granttary konkýrsyna qatysý jáne aqyly negizde oqýǵa túsý úshin UBT nátıjeleri boıynsha kelesi shekti baldar belgilengen:
«Quqyq» jáne «Pedagogıkalyq ǵylymdar» baǵyttary boıynsha – keminde 75 ball;
«Densaýlyq saqtaý jáne áleýmettik qamtamasyz etý (medıtsına)» baǵyty boıynsha – keminde 70 ball;
Ulttyq joǵary oqý oryndaryna túsý úshin – keminde 65 ball;
Basqa joǵary oqý oryndaryna túsý úshin – keminde 50 ball;
Qazaq ulttyq sý sharýashylyǵy jáne ırrıgatsııa ýnıversıtetine túsý úshin – keminde 50 ball.
Aıta ketý kerek, joǵary oqý oryndary bilim berý granttaryn taǵaıyndaý konkýrsyna qatysý jáne aqyly negizde oqýǵa qabyldaý úshin óz shekti balldaryn ózderi belgileýge quqyly.
2025 jylǵy qabyldaý naýqanynyń erekshelikteri
2025 jyly «Tsıfrlyq ýnıversıtet» qaǵıdatyn iske asyrý jalǵasyp jatyr: úderisterdiń basym bóligi avtomattandyrylǵan, bul konkýrstyq irikteýdiń ashyqtyǵyn arttyrady.
Tsıfrlyq ekonomıkaǵa kadrlar daıarlaý aıasynda suranysqa ıe tehnıkalyq jáne IT baǵyttar boıynsha qosymsha granttar bólindi.
Aýyl mektepteriniń túlekteri úshin kvotalar qarastyrylǵan.
Áleýmettik osal toptarǵa jatatyn talapkerlerdi qoldaý memleket pen maqsatty granttar sheńberindegi kvotalar arqyly júzege asyrylady.
Mınıstrlik talapkerlerdi elektrondyq servısterdi belsendi paıdalanýǵa, sondaı-aq qabyldaý erejelerimen, qajetti qujattar tizimimen jáne qujat tapsyrý merzimderimen muqııat tanysýǵa shaqyrady.
Tolyǵyraq aqparat Ǵylym jáne joǵary bilim mınıstrliginiń jáne Ulttyq testileý ortalyǵynyń resmı saıttarynda qoljetimdi.
Aıta ketelik elimizde shildeden bastap ÚEU-ǵa memlekettik grant berý erejeleri jańartylatyny týraly jazǵan edik.