Mınıstrlik tabysyn jarııalaǵan blogerlerge qatysty málimet berdi

ASTANA. KAZINFORM — Qarjy vıtse-mınıstri Dáýren Temirbekov tabysyn ashyq kórsetken blogerlerge qatysty túsinik berdi. 

— Qazir shamamen 850 blogerge habarlama jiberildi. Onyń jartysynan sál azy, ıaǵnı 360-qa jýyq bloger óz erkimen 10,5 mlrd teńge somasyndaǵy tabysyn rastady. Tólem 256 mln teńge (salyq) boldy. Bul baǵytta jumys jalǵasyp jatyr. Atap aıtqanda, jalpy 850 bloger qamtylǵan edi, — dedi Dáýren Temirbekov Parlament Májilisinde 2024 jylǵy bıýdjettiń atqarylýy týraly Úkimet esebin talqylaýdan keıingi baspasóz máslıhatynda.

Onyń aıtýynsha, eger qalǵandary salyq tólemese, onda zańnamaǵa sáıkes tıisti is-sharalar, ıaǵnı májbúrlep óndirip alý is-qımyldary jasalady.

Aıta keteıik, buǵan deıin 53,3 mlrd teńgege tabysyn jasyrǵan blogerler anyqtalǵanyn habarlaǵan edik. 

Jaýapty organdardyń habarlamasynan keıin blogerler mıllıardtaǵan kirisin kórsete bastaǵan. 

Bıyl sáýirde 338 bloger salyq tóledi.