Mınıstrlik suıytylǵan munaı gazynyń kóterme shekti baǵasyn qaıta bekitýdi josparlap otyr
ASTANA. KAZINFORM — Energetıka mınıstrligi «Qazaqstan Respýblıkasynyń ishki naryǵyna suıytylǵan munaı gazyn berý jospary sheńberinde taýar bırjalarynan tys ótkiziletin suıytylǵan munaı gazynyń kóterme saýdada ótkizýdiń shekti baǵalaryn bekitý týraly» buıryq jobasyn Ashyq NQA portalyna talqylaýǵa shyǵardy.
Mınıstrlik málimetinshe, 2026 jyldyń 1 qańtarynan bastap suıytylǵan munaı gazynyń kóterme saýdadaǵy shekti baǵasyn burynǵy deńgeıde qaıta bekitý josparlanyp otyr.
— Bul buıryq jobasynyń maqsaty ishki naryqtaǵy baǵa turaqtylyǵyn saqtaý jáne suıytylǵan munaı gazynyń úzdiksiz jetkizilýin qamtamasyz etý. Qujatty qabyldaý áleýmettik-ekonomıkalyq nemese quqyqtyq teris saldarǵa ákelmeıdi, — delingen habarlamada.
Jobaǵa sáıkes, suıytylǵan munaı gazynyń shekti kóterme baǵasyn qaıta belgileý ishki naryqty turaqty qamtamasyz etýge jáne óndirýshiler men tutynýshylar arasyndaǵy teńgerimdi saqtaýǵa baǵyttalǵan.
Jarııa talqylaý merzimi 2025 jyldyń 25 qarashasyna deıin jalǵasady.
Eske sala keteıik, Energetıka mınıstrligi suıytylǵan gazdy el aýmaǵynan syrtqa shyǵarýǵa salynǵan tyıymdy taǵy 6 aıǵa uzartý týraly buıryq jobasyn kópshilik talqylaýyna shyǵarǵan edi.
Oǵan qosa, Batys Qazaqstan oblysynda suıytylǵan munaı gazy tapshylyǵy únemi qaıtalanyp keletinin jazǵanbyz.