Mınıstrlik sý resýrstaryn qorǵaý men paıdalanýdyń basseındik josparyn ázirleýdi bastady
ASTANA.KAZINFORM - Sý resýrstary jáne ırrıgatsııa mınıstrligi sý resýrstaryn qorǵaý men paıdalanýdyń basseındik josparlaryn ázirleýdi bastady. Bul týraly vedomstvo basshysy Nurjan Nurjigitov Parlament Senatynyń qoldaýymen ótkizilip jatqan «Taldaý mektebi» qoǵamdyq jobasynyń qatysýshylarymen kezdesýde aıtty.
Sý qoryn qorǵaý jáne paıdalaný salasyndaǵy josparlaý júıesin qalyptastyrý bóliginde Sý kodeksin iske asyrý úshin mınıstrlik eldiń segiz sý sharýashylyǵy basseıniniń árqaısysy boıynsha sý resýrstaryn qorǵaý jáne paıdalaný josparyn ázirleýge kiristi. Osy qujattar negizinde Sý resýrstaryn keshendi basqarýdyń bas jospary daıyndalady.
Barlyq basseındik jospardy ázirleýdi jyl sońyna deıin aıaqtaý josparlanyp otyr. Al bas jospar 2027 jyldyń sońyna deıin aıaqtalady. Bul qujattar memlekettik josparlaýdyń mańyzdy elementterine aınalady.
- Memleket basshysy Qazaqstannyń sý-energetıka kartasyn jasaýdy tapsyrdy. Basseındik jáne bas jospar bul kartany ázirleýge negiz bolady. Biz sý nysandarynda elektr energııasyn óndirý úshin qansha kólemde sý paıdalanýǵa bolatynyn naqty anyqtaı alamyz. Bul másele Sý kodeksin ázirleý kezinde de eskerilgen», – dedi Sý resýrstary jáne ırrıgatsııa mınıstri Nurjan Nurjigitov.
Kezdesý barysynda Nurjan Nurjigitov, mınıstrlik mamandary men vedomstvoǵa qaraıtyn uıymdar basshylary «Taldaý mektebiniń» qatysýshylaryna byltyr qabyldanǵan Sý kodeksindegi jańashyldyqtar, sý sharýashylyǵy sektoryn tsıfrlandyrý jumystary jáne ınfraqurylymdyq jobalar týraly aqparat berdi.
Baıandama bóligi aıaqtalǵannan keıin qatysýshylar mınıstrge salanyń kadr áleýetin arttyrý, paıdalanylyp jatqan tsıfrlyq sheshimder jáne qoǵamda sý resýrstaryna uqypty qaraý mádenıetin qalyptastyrý máseleleri boıynsha suraqtar qoıdy.
«Taldaý mektebi» jobasy 2021 jyly Senat janyndaǵy Jas sarapshylar klýbynyń bastamasymen qolǵa alynǵan. Jobaǵa qatysýshylar segiz apta boıy derekterdi jınaý jáne taldaý ádisterin meńgerip, analıtıkalyq materıaldar daıyndaý tásilderin jetildiredi. Oqý aıaqtalǵannan keıin analıtıkter mınıstrlikke óz usynystaryn joldaıdy.
Osyǵan deıin sý resýrstaryn basqarýdyń ulttyq tsıfrlyq júıesi iske qosylatyny týraly jazdyq.
