Mınıstrlik sý qoımalaryn iri balyq óńdeýshi ınvestorlarǵa konkýrssyz berýdi usyndy

ASTANA. KAZINFORM — Ekologııa jáne tabıǵı resýrstar mınıstrligi sý qoımalaryn iri balyq óńdeýshi ınvestorlarǵa konkýrssyz berýdi usyndy.

Májiliste Ekologııa jáne tabıǵı resýrstar vıtse-mınıstri Nurken Shárbıev balyq sharýashylyǵyn damytýǵa baǵyttalǵan zańnama ózgeristerin tanystyrdy.

Zań jobasyn talqylaý kezinde depýtattar halyqaralyq jáne memlekettik mańyzdaǵy sý qoımalaryn iri ınvestorlarǵa konkýrssyz berý naryqta teńsizdik týyndatýy múmkin degen qaýpin aıtty.

Vıtse-mınıstrdiń aıtýynsha, mundaı múmkindik balyq óńdep, iri kásiporyn salýǵa 550 mln teńgeden astam ınvestıtsııa quıatyn ınvestorlarǵa ǵana berilmek.

Prezıdenttiń balyq óńdeý salasyn damytý týraly tapsyrmasyn oryndap, ınvestıtsııa kólemin ulǵaıtý úshin osyndaı sharaǵa baryp otyrǵan kórinedi.

Depýtat Qazybek Álishev zań jobasynda balyq ósirýshilerge 4 birdeı sýbsıdııa túri usynylý kózdelgenin aıtyp, sý aıdynyn konkýrssyz berý ádiletsizdik týǵyzatynyn aıtty.

Májilis ókilderiniń qarsylyǵynan keıin vıtse-mınıstr bul máseleni zań jobasyn pysyqtaý kezinde qaıta qaraýǵa ýáde berdi.

Depýtat aıtqanda mınıstrlik ázirlegen zań jobasynda balyq ósirýshilerge shynymen de 4 túrli sýbsıdııa berý usynylǵan.

«Zań jobasynda memlekettik qoldaýdyń 4 túrli sharasy qarastyrylǵan. Onyń ekeýi qazirdiń ózinde qoldanysta bar. Onyń biri — balyq jemine, balyqqa qolaıly orta jasaıtyn materıaldarǵa, dári-dármekke, analyq tuqymdy kútip ustaýǵa ketetin shyǵyndy sýbsıdııalaý. Sondaı-aq, kúrdeli qurylys pen qondyrǵylar salýǵa ketken shyǵynnyń bir bóligin ótep berý sharasy bar. Endi osylarǵa sýbsıdııanyń eki jańa túri usynylyp otyr. Birinshisi — balyq jumsalatyn sýdyń shyǵynyn sýbsıdııalaý. Ekinshisi — kredıtterdiń syıaqy mólsherlemesin sýbsıdııalaý. Muny agroónerkásip keshenin sýbsıdııalaý júıesi arqyly iske asyrý josparlanyp otyr», — dedi Nurken Shárbıev.

Sondaı-aq, ol jobalardy memleket tarapynan ǵylymı turǵyda súıemeldeý sharalary kózdelgenin aıtty.