Mınıstrlik sý qorǵaý aýmaqtarynda úı salýǵa tyıym engizýdi usynyp otyr
Tótenshe jaǵdaılar mınıstri Syrym Sháriphanov Úkimet otyrysynda oıpatty bólikter men sý qorǵaý aýmaqtarynda úı salýǵa tyıym engizýdi usyndy, dep Kazinform.
«Ótken jylǵy taldaý kórsetkendeı, negizinen oıpatty bólikterde salynǵan, sondaı-aq sý qorǵaý beldeýlerinde jáne ózen arnalaryna jaqyn ornalasqan úıler sý astynda qalady. Mysaly, bul Qostanaı oblysy Qaramyrza aýylyndaǵy Timtýir ózeniniń jaǵasynda ornalasqan turǵyn úılerdiń sý basýy birinshi jyl emes. Ótken jyly Batys Qazaqstan oblysynda Shyńǵyrlaý ózeniniń sý deńgeıi kúrt kóterilýine baılanysty, janynda ornalasqan Kentúbek jáne Baqtyaral aýyldarynda úılerdiń sý basty. Túrkistan oblysy Arys qalasyndaǵy sý basqan turǵyn úıler sý qorǵaý beldeýleriniń aýmaǵynda ornalasqan jáne Aqtóbe oblysynyń Qobda aýylyndaǵy úıler oıpatty bóliginde salynǵan», - dedi mınıstr.
Vedomstvo basshysy Premer-Mınıstrge bul máseleni sheshýdiń jolyn da usyndy.
«Qazirgi ýaqytta ǵımarattardy sý qorǵaý beldeýlerine ornalastyrý barlyq jerde problema bolyp tabylady. Nátıjesinde, sý tasqynynan zardap shekken azamattarǵa memleket ótemaqy tólemderin júrgizedi. Osyǵan baılanysty, ákimdikter birinshi kezekte, osy eldi mekenderdi qorǵaýdy qamtamasyz etýin nemese olardy kóshirý múmkindigin qaraýyn jáne bul aımaqtarda bolashaqta qurylysqa tyıym salýyn qajet dep sanaımyn», - dedi Syrym Sháriphanov.
