Mınıstrlik sý berýdiń turaqtylyǵyn aldyn ala qamtamasyz etpek
ASTANA. KAZINFORM — Sý resýrstary jáne ırrıgatsııa mınıstrligi 2027 jylǵy sýarý kezeńine daıyndyq josparyn ázirledi.
Sý resýrstary jáne ırrıgatsııa mınıstri Nurjan Nurjigitov apparat keńesin ótkizdi. Jıynda bıylǵy vegetatsııa kezeńiniń qorytyndylary shyǵarylyp, 2027 jylǵa arnalǵan josparlar qaraldy.
Eske sala keteıik, 2026 jylǵy vegetatsııa kezeńi shtattyq rejımde ótti. Jedel málimetterge sáıkes, Qazaqstanda sýarý qajettiligi úshin naqty sý alý kólemi 11,1 mlrd tekshe metr bolyp, shamamen 1,1 mln gektar egistik alqap sýaryldy.
Kelesi sýarý maýsymyna daıyndyq aıasynda Sý resýrstary jáne ırrıgatsııa mınıstrliginiń Sý resýrstaryn retteý, qorǵaý jáne paıdalaný komıteti is-sharalar josparynyń jobasyn ázirledi.
Qujatta sýarý jáne kollektorlyq-drenajdyq jelilerdi, sonyń ishinde olardy tazalaý jáne jóndeý jumystaryn daıyndaý, aýyspaly egistikti qamtamasyz ete otyryp, egis qurylymyn ornalastyrý jáne kelisý, Qyzylqum sýarmaly alqabynda aýyl sharýashylyǵy daqyldaryn ornalastyrýdyń ǵylymı negizdelgen josparyn ázirleý, sondaı-aq sý kózderiniń naqty múmkindikterin eskere otyryp, sý paıdalaný rejımderin bekitý sharalary qamtylǵan.
Sonymen qatar bıik ornalasqan ýchaskelerge sorǵy qondyrǵylary arqyly sý berýdi uıymdastyrý, sýdy bólý máselelerin sheshý jáne tótenshe jaǵdaılar týyndaǵan kezde jedel áreket etý úshin turaqty mobıldi jumys toptaryn qurý kózdelgen. Budan bólek, azamattarǵa sý únemdeý tehnologııalaryna kóshýdiń artyqshylyqtary, shart jasasý tártibi, sý esepteý quraldaryn ornatý jáne sýdy zańsyz alǵany úshin jaýapkershilik týraly turaqty túsindirý jumystaryn júrgizý josparlanǵan.
Keńes qorytyndysy boıynsha Nurjan Nurjigitov Sý resýrstaryn retteý, qorǵaý jáne paıdalaný komıtetine, «Qazsýshar» RMK-ǵa jáne jaýapty departamentterge kelesi vegetatsııa kezeńine daıyndyq jumystaryn bastaýdy tapsyrdy.
— Kelesi jylǵa daıyndyqty qazirden bastaý kerek. Biz sharttardy rásimdeýge jáne sý berýge daıyn bolǵansha aýyl sharýashylyǵy kútip otyrmaıdy. Qalaı bolǵanda da, sý berýdiń turaqtylyǵyn qamtamasyz etý qajet. Qaı ýaqytta bolatyny mańyzdy emes. Sondyqtan jumysqa aldyn ala kirisý kerek, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik Qazaqstanda sý únemdeý tehnologııalary 700 myń gektardan astam jerge engizildi.
