Mınıstrlik sottalǵan júkti áıelderge qatysty aqparatqa túsinikteme berdi
ASTANA. KAZINFORM – Densaýlyq saqtaý mınıstrligi Qylmystyq-atqarý júıesi mekemelerindegi júkti áıelderge qatysty BAQ-ta taratylatyn aqparat shyndyqqa janaspaıtynyn aıtty.
Tergeý ızolıatorlary men mekemelerindegi júkti áıelderge bosandyrý kómegi perzenthanalarda (bólimshelerde) júzege asyrylady.
— Bosaný jáne hırýrgııalyq aralasý kezinde sottalǵan júkti áıelderge qatysty kisender paıdalanylmaıdy. Bosanǵannan keıin áıelder jınalmaly kúzet quraldarymen jabdyqtalǵan palatalarǵa ornalastyrylady, bul olardyń qaýipsizdigin de, ustaý quqyqtary men sharttarynyń saqtalýyn da qamtamasyz etedi, — delingen DSM habarlamasynda
Bul sharalar izgilikpen qaraýdy qamtamasyz etýge, zańnamany saqtaýǵa jáne kómek kórsetýdiń medıtsınalyq standarttaryn oryndaýǵa baǵyttalǵan.
Bul rette mınıstrlik óńirlermen birlesip medıtsınalyq kómektiń qoljetimdiligi men sapasyn jaqsartý jóninde turaqty negizde sharalar qabyldap jatyr. QAJK-men birlesip Bas prokýratýranyń qoldaýymen ınfraqurylym jaqsardy, 55 nysanǵa aǵymdaǵy jáne kúrdeli jóndeý júrgizildi jáne birqatar jańa dárigerlik ambýlatorııalar salý josparlandy.
— Skrınıngtik tekserýler, telemedıtsınalyq qyzmetter engizildi, bul arnaıy mamandardyń konsýltatsııalarynyń qoljetimdiligin arttyrdy.
Mınıstrlik adamgershilikpen qaraý qaǵıdattary men medıtsınalyq standarttardy saqtaı otyryp, medıtsınalyq kómektiń sapasy men qoljetimdiligin arttyrý boıynsha dáıekti jumysty jalǵastyryp jatyr, — delingen habarlamada.
Aıta ketelik depýtat sheteldikter úshin «sýrrogat ana» bolýǵa tyıym salýdy usynǵan edi.