Mınıstrlik sırek metall kelisimderi týraly: Keıbirin ǵana ashyq jarııalaı alamyz

ASTANA. KAZINFORM – Ónerkásip jáne qurylys mınıstrligi Kazinform saýalyna joldaǵan jaýapta sırek metall qory anyqtalǵan ken oryndaryn ıgerý jónindegi kelisimsharttardyń qupııa jasalatynyn moıyndady. Vedomstvo málimetinshe, mundaı kelisimderdiń tek keıbiri ǵana taraptardyń kelisimimen jarııalanýy múmkin.

 Máseleniń mánisi

Qoldanystaǵy Konstıtýtsııanyń 6-babynyń 3-tarmaǵy boıynsha, jer qoınaýy Qazaqstan halqyna tıesili jáne memleket ony halyqtyń atynan basqarady. Osyǵan baılanysty qoǵamda sırek metall qory anyqtalǵan ken oryndaryn ıgerý jónindegi kelisimsharttar ashyq jarııalanýǵa tıis degen talap kóterilip júr.

Bul másele Qazaqstanda buǵan deıin Teńiz, Qashaǵan jáne Qarashyǵanaq sııaqty iri munaı ken oryndaryn ıgerý kelisimderi uzaq ýaqyt boıy jarııa etilmegenimen baılanysty jıi talqylanady.

Mınıstrliktiń ustanymy qandaı?

Mınıstrlik ókilderi Kazinform saýalyna bergen jaýapta kelisimsharttardyń jarııalylyǵy shekteýli ekenin rastady.

— Jalpy qalyptasqan tájirıbege sáıkes, kelisimsharttardyń is júzinde barlyǵy derlik qupııa negizde jasalady. Olardyń keıbiri ǵana taraptardyń erik bildirýine baılanysty kópshilikke qoljetimdi bolýy múmkin, — dep jazylǵan vedomstvonyń resmı jaýabynda.

Bul nege mańyzdy?

Vedomstvo taraptardyń kelisimimen buryn jarııalanǵan kelisimsharttardyń naqty sanyn jáne olardyń mátinderi qaıda jarııalanǵanyn kórsetpedi. Halyqaralyq tájirıbede jer qoınaýyn paıdalaný jónindegi kelisimsharttardyń ashyqtyǵy tabıǵı resýrstardy basqarýdyń mańyzdy elementi bolyp esepteledi. Mundaı kelisimderdiń mátinderi memlekettik organdardyń resmı saıttarynda nemese arnaıy ashyq derekqorlarda jarııalanady. Bul qoǵamnyń tabıǵı resýrstardy paıdalaný sharttarymen tanysýyna jáne memleket pen ınvestorlar arasyndaǵy mindettemelerdiń oryndalýyn qoǵamdyq baqylaýǵa múmkindik beredi.

Eske salsaq, buǵan deıin «Sırek metall ındýstrııasy munaı-gaz ónerkásibiniń qateligin qaıtalap júrmeı me?» degen saýalǵa jaýap izdep kórgen edik.