Mınıstrlik rezıdentýra túlekteri emtıhannan jappaı qulady degen aqparatty joqqa shyǵardy

Mınıstrlik málimetinshe, qorytyndy attestattaýdyń ekinshi kezeńine rezıdentýranyń 3 684 túlegi qatysqan. Onyń ishinde 3 540 túlek nemese 96,5%-y emtıhannan sátti ótip, óz biliu3y rastaǵan. Shekti deńgeıden óte almaǵandar sany 134 adamdy (3,5%) qurady. Al emtıhannyń ortasha nátıjesi 80,7 ball bolǵan.

Vedomstvonyń habarlaýynsha, keıingi kúnderi áleýmettik jelilerde jekelegen túlekter qorytyndy attestattaýdyń nátıjelerimen kelispeıtinin málimdegen jazabalar taraǵan. Osyǵan baılanysty mınıstrlik barlyq ýájdi zerdelep, emtıhandy ótkizý tártibi, tapsyrmalardyń mazmuny men baǵalaý júıesine taldaý júrgizgen.

Taldaý nátıjesinde qorytyndy attestattaýdyń qoldanystaǵy zańnama talaptaryna tolyq sáıkes uıymdastyrylǵany anyqtalǵan. Sondaı-aq emtıhan tapsyrmalary bekitilgen spetsıfıkatsııalar negizinde ázirlenip, birneshe kezeńnen turatyn testologııalyq, ádistemelik jáne mazmundyq saraptamadan ótken. Saraptama jumysyna joǵary jáne joǵary oqý ornynan keıingi bilim berý uıymdarynyń professorlyq-oqytýshylyq quramy, sondaı-aq ǵylymı-zertteý ınstıtýttary men ǵylymı ortalyqtardyń mamandary qatysqan.

Mınıstrlik memlekettik tildegi tapsyrmalardyń sapasyna qatysty túsken shaǵymdar da tekserilgenin málimdedi. Tekserý barysynda barlyq materıaldardyń derbes mazmundyq jáne lıngvıstıkalyq saraptamadan ótkeni anyqtalyp, sózbe-sóz aýdarylǵan nemese beıimdeýsiz berilgen tapsyrmalar faktileri tirkelmegen.

— Sonymen qatar aqparattyq júıege júrgizilgen taldaý shekti deńgeıden óte almaǵan túlekterdiń basym bóligi emtıhanǵa berilgen 90 mınýttyń tolyq ýaqytyn paıdalanbaǵanyn kórsetken. Kóptegen qatysýshy jumysty merziminen buryn aıaqtap, jaýaptaryn qaıta qarap shyǵý jáne klınıkalyq jaǵdaılardy qaıta taldaý múmkindigin qoldanbaǵan, — delingen habarlamada.

Mınıstrlik emtıhan barysynda árbir túlek aqparattyq júıe arqyly naqty tapsyrmalar boıynsha apellıatsııa bere alǵanyn atap ótti. Túsken barlyq ótinishter qoldanystaǵy zańnamaǵa sáıkes Respýblıkalyq apellıatsııalyq komıssııanyń qaraýyna jiberilgen.

Vedomstvo qorytyndy attestattaý medıtsınalyq mamandardyń kásibı daıarlyǵyn baǵalaýdyń mańyzdy kezeńi ekenin eske saldy. Mınıstrliktiń málimetinshe, rezıdentýra 2 jyldan 4 jylǵa deıingi praktıkalyq daıarlyqty qamtıdy, al emtıhannan ótkenderdiń joǵary úlesi qazaqstandyq medıtsınalyq joǵary oqý oryndary men klınıkalyq bazalarda halyqaralyq standarttarǵa saı maman daıarlanatynyn kórsetedi.

Salystyrý úshin mınıstrlik Ulybrıtanııadaǵy rezıdentýra túlekteriniń qorytyndy biliktilik emtıhandaryn sátti tapsyrý kórsetkishi shamamen 60-65% ekenin keltirgen.

Sonymen birge mınıstrlik emtıhannan óte almaǵan túlekterdiń alańdaýshylyǵyn túsinetinin, alaıda barlyq úmitker úshin teń jaǵdaı men zań talaptarynyń saqtalýyn qamtamasyz etýge mindetti ekenin málimdedi.

Qoldanystaǵy qaǵıdalarǵa sáıkes shekti deńgeıden óte almaǵan árbir túlek 6 aıdan keıin qorytyndy attestattaýdan qaıta óte alady.

Densaýlyq saqtaý mınıstrliginiń ókilderi medıtsınalyq kadrlardy daıarlaý sapasy men qorytyndy baǵalaýdyń obektıvtiligi basty basymdyq bolyp qala beretinin aıtyp, barlyq ótinishterdi zańnamada belgilengen tártippen qaraýǵa daıyn ekenin jetkizdi.

Eske salaıyq, buǵan deıin Ulttyq testileý ortalyǵy magıstratýraǵa túsýge daıyndalyp jatqan azamattardy ınternette taralyp jatqan jalǵan usynystardan saq bolýǵa úndegen edi.