Mınıstrlik respýblıkalyq fızıka-matematıka mektepteri fılıaldaryna grant bólý konkýrsyn jarııalady
ASTANA. KAZINFORM – Oqý-aǵartý mınıstrligi Respýblıkalyq fızıka-matematıka mektepteri fılıaldaryna bilim berý granttaryn bólý konkýrsyna qatysty tómendegini habarlaıdy.
Respýblıkalyq fızıka-matematıka mektepteri fılıaldaryna qabyldaý mektep Jarǵysyna sáıkes ashyq konkýrs negizinde júrgiziledi.
«Bilim týraly» Qazaqstan Respýblıkasy Zańynyń 49-babyna sáıkes, kámeletke tolmaǵan balalardyń ata-analary men zańdy ókilderi balanyń tilegi, jeke beıimdiligi men erekshelikterin eskere otyryp, bilim berý uıymyn jáne oqý tilin tańdaý quqyǵyna ıe. Osyǵan baılanysty konkýrsqa tirkelý kezinde úmitkerler oqý tilin ózderi anyqtaıdy.
Bilim berý granttarynyń sany men konkýrs oryndary mektep fılıaldarynyń synyptardy jınaqtaý múmkindikterine qaraı belgilenedi.
Konkýrstyq irikteýdiń ádildigi men obektıvtiligin qamtamasyz etý úshin barlyq qatysýshylarǵa birdeı talaptar qoıylady. Emtıhan tapsyrmalary taqyryptyq baǵyt, qurylym jáne kúrdelilik deńgeıi boıynsha birdeı bolyp, akademııalyq adaldyq qaǵıdalaryn saqtaý maqsatynda birneshe nusqada usynylady.
Shekti ótý baly aldyn ala bekitilmeıdi jáne konkýrs jarııalanǵan kezde anyqtalmaıdy. Bul kórsetkish qabyldaý emtıhandary aıaqtalǵan soń qatysýshylardyń nátıjeleri men jalpy konkýrstyq jaǵdaıǵa baılanysty belgilenedi. Mundaı tásil barlyq úmitkerler úshin teń múmkindik qaǵıdatyn saqtaýǵa baǵyttalǵan.
Qazirgi ýaqytta Oqý-aǵartý mınıstrligi konkýrstyq rásimderdiń ashyqtyǵy men obektıvtiligine qatysty túsken ótinishter men usynystardy taldaýda.
Árbir ótinish belgilengen tártippen qaralady, sonymen qatar qosymsha zerdeleý men saraptamalyq taldaý júrgiziledi.
Taldaý nátıjeleri men qabyldanǵan sheshimder týraly resmı aqparat keıinirek jarııalanady. Bul másele Oqý-aǵartý mınıstrliginiń baqylaýynda tur.
Eske sala keteıik, buǵan deıin Qazaqstan túrki memleketteriniń azamattaryn oqytýǵa arnaıy granttar bólýge daıyn ekenin jazǵan edik.
