Mınıstrlik pen óńirler qoqys óńdeýdi sozbalańǵa salyp jiberdi – Premer-Mınıstr
ASTANA. KAZINFORM – QR Premer-Mınıstri Oljas Bektenov elimizde qaldyqtardy basqarý ınfraqurylymyn damytý máselesi sol kúıi tolyq sheshimin tappaǵanyn synǵa aldy.
«Halyqaralyq tájirıbe kórsetip otyrǵandaı, damyǵan elder turmystyq qaldyqtardy qaıtadan óńdep, barynsha kádege jaratýda. Al bizde qarapaıym sózben aıtqanda, jınalǵan qoqysty jerge kóme salý, tipti taýdaı qylyp úıip qoıý úırenshikti jaǵdaıǵa aınaldy. Bul eldi mekenderdiń kórkin buzýmen qatar, eshqandaı sanıtarııalyq, ekologııalyq normalarǵa saı kelmeıdi», - dedi O. Bektenov Úkimet otyrysynda.
Sonymen birge, Úkimet basshysy tamaq qaldyqtaryn kádege jaratý men qaıta óńdeý máseleleri de qaýipti ekenin atap ótti.
«Atalǵan problemalardy sheshý úshin qaldyq jınaýdan bastap, qaıta óńdeýge deıin kádege jaratýdyń tıisti mehanızmderin ázirleý qajet. Mınıstrlik pen óńirler bul jumysty sozbalańǵa salyp jiberdi. Kásiporyndardyń kópshiligi qaıtalama shıkizatty jınaýmen, ony býyp-túıip, shetelge satýmen ǵana aınalysady. Al qaldyqtardy qaıta óńdep, túpkilikti ónim shyǵaryp otyrǵandar az», - dedi Oljas Bektenov.
Mysaly Soltústik Qazaqstan oblysynda «Radýga» kompanııasy polıetılen men qaǵaz qaldyqtaryn qaıta óńdep, halyq tutynatyn ár túrli taýarlar óndiredi. Shymkentte «Evrokrıstall» kompanııasy shynyny qaıta óńdep, ydys-aıaq shyǵarady.
Almaty oblysynda «KZ recycling» kompanııasy makýlatýradan qaǵaz ónimderin shyǵarady.Al Qyzylorda oblysynda árbir aýdan qaldyqtardy qaıta óńdeýge qatysty óz jobalaryn iske asyrýda.
«Osyndaı oń tájirıbeler ár óńirde bolýǵa tıis. Alaıda Atyraý, Aqtóbe jáne Abaı oblystarynda kópten beri qaldyqtardy suryptaý jelisin iske qosa almaı keledi. Búkil álemde qoqysty qaıta óńdeý tabysty bıznes bolyp sanalady. Biz de bul baǵytta zamana kóshinen qalmaýǵa tıispiz», - dedi Premer-Mınıstr.
