Sý salasy mamandary sýarmaly sýdy ádil bólý úshin túngi kezekshilikke shyǵa bastady
ASTANA. KAZINFORM – Qazaqstannyń ońtústik aımaqtarynda Sý resýrstary jáne ırrıgatsııa mınıstrligi men «Qazsýshar» RMK-nyń fılıaldarynyń mamandary jergilikti atqarýshy organdarmen birge sýarmaly sýdyń ádil bólinýin táýlik boıy baqylaý maqsatynda túngi kezekshilikterge shyǵyp júr. Bul týraly vedomstvonyń baspasóz qyzmeti málim etti.
Kezekshilik shilde aıynyń basynda bastaldy. Qazirgi tańda dıqandarǵa sý kezekpen berilip jatyr. Sý resýrstary shekteýli bolǵandyqtan, sýdy bólý kezinde eń aldymen magıstraldyq kanaldardyń tómengi bóliginde ornalasqan sharýa qojalyqtaryna basymdyq beriledi. Bul rette sý tek «Qazsýshar» RMK-men tıisti kelisimshart jasaǵan sharýalarǵa ǵana beriledi.
Bıylǵy sýarý kezeńiniń basynan beri Qazaqstanda aýyl sharýashylyǵynyń qajettiligine 8 mlrd tekshe metrden astam sý paıdalanyldy. Onyń shamamen 7,7 mlrd tekshe metri ońtústiktegi bes óńirge tıesili. Búgingi tańda Túrkistan, Qyzylorda, Jambyl, Almaty jáne Jetisý oblystarynda 793 myń gektardan astam jer sýaryldy.
Qazaqstannyń ońtústik óńirlerinde sýarmaly sýdyń ádil bólinýin qamtamasyz etý maqsatynda mınıstrlik tórt jumys tobyn qurdy. Bul toptar kanaldar men basqa da sý nysandaryn turaqty túrde baqylaýda ustap otyr. Sonymen qatar sý zańnamasyn buzǵany úshin jaýapkershilik kúsheıtildi, sýarmaly sýdy paıdalaný erejeleri qabyldandy. Jergilikti atqarýshy jáne quqyq qorǵaý organdarymen ózara is-qımyl kúsheıtildi. Budan bólek, sý kezekpen berilip, dıqandarmen túngi sýarý men egis aınalymyna kóshý boıynsha túsindirý jumystary júrgizilip jatyr. Ońtústik óńirlerdegi vegetatsııa kezeńi barysy mınıstrliktiń turaqty baqylaýynda, – dedi Sý resýrstary jáne ırrıgatsııa mınıstriniń keńesshisi Nurmuhammed Nııazbekov.
Qazaqstannyń ońtústiginde sýarý kezeńi 20 kúnge erte bastalǵanyn eske sala keteıik. Aýa temperatýrasynyń joǵary bolýy men jaýyn-shashynnyń bolmaýy buǵan sebep bolǵan edi.
Eske sala keteıik, buǵan deıin otandyq sý salasy mamandary Qytaı, Frantsııa, AQSh, Japonııa syndy shet memleketterde biliktiligin arttyryp jatqanyn jazǵan edik.