Mınıstrlik olımpıadalyq rezervti daıarlaýǵa qoıylatyn talaptardy kúsheıtedi
ASTANA. KAZINFORM — Týrızm jáne sport mınıstrligi olımpıadalyq rezervti daıarlaýǵa qoıylatyn talaptardy kúsheıtedi.
Elordada Týrızm jáne sport mınıstri Erbol Myrzabosynovtyń tóraǵalyǵymen olımpıadalyq rezervtiń mamandandyrylǵan mektep-ınternat-kolledjderiniń jumysyn taldaý jáne jetildirýge arnalǵan keńes ótti.
Іs-sharaǵa óńirlik sport basqarmalarynyń basshylary, olımpıadalyq rezerv mektep-ınternat-kolledjderiniń dırektorlary, sport federatsııalarynyń ókilderi jáne salalyq uıymdardyń jetekshileri qatysty.
Keńes barysynda Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Amanbaı Nurmuhanbetov sapaly sport rezervin qalyptastyrý úshin mamandandyrylǵan mektep-ınternat-kolledjderiniń jumysyn keshendi túrde qaıta qaraý qajettigin atap ótti.
— Qazirgi ýaqytta elimizde 16 oblystyq mamandandyrylǵan olımpıadalyq rezerv mektep-ınternat-kolledji, 1 respýblıkalyq sport kolledji jáne 3 respýblıkalyq mamandandyrylǵan olımpıadalyq rezerv mektep-ınternat-kolledji jumys isteıdi. Atalǵan uıymdarda sporttyń 41 túri damytylyp, 6 381 tárbıelenýshi bilim alyp jatyr.
Osyǵan baılanysty atalǵan uıym basshylary úshin negizgi tıimdilik kórsetkishteri (KPI) júıesin engizý usynyldy. Negizgi ólshemderdiń biri retinde oblystyq ınternattarda óńirlik quramaǵa, al respýblıkalyq ınternattarda ulttyq quramaǵa engen sportshylardyń úlesin arttyrý kózdelip otyr.
Sonymen qatar jattyqtyrýshy-pedagogıkalyq quramnyń qyzmetin jan-jaqty baǵalaý qajettigi aıtyldy, — delingen mınıstrlik habarlamasynda.
Jıyn qorytyndysy boıynsha sport túrleri boıynsha naqty mamandandyrýdy kúsheıtý, materıaldyq-tehnıkalyq baza men kadrlyq áleýetke sáıkes qaıta bólý, sondaı-aq kolledjderdegi oqý merzimin 2 jyl 10 aıdan 2 jylǵa deıin qysqartý usynyldy. Únemdelgen qarajatty bakalavrıat deńgeıindegi memlekettik granttardy qarjylandyrýǵa baǵyttaý josparlanyp otyr.
Aıta ketelik Astana 2026 jyly ótetin Bolashaq oıyndarynyń estafetasyn qabyldady.