Mınıstrlik ókili stýdent jataqhanalarynda sýıtsıdtiń jıileýin BAQ jumysymen baılanystyrdy

ASTANA. KAZINFORM – Ǵylym jáne joǵary bilim mınıstrligi Joǵary jáne joǵary oqý orynnan keıingi bilim komıteti tóraǵasynyń mindetin atqarýshy Aqerke Abylaıhan stýdent jataqhanalarynda sýıtsıdtiń jıileýin BAQ ókilderiniń jumysymen baılanystyrdy.

- Baıqasańyzdar, keıingi ýaqytta sýıtsıd faktileriniń stsenarııi birkelki. Bárinde qulap ólgen. BAQ ókilderi, «Verter effektisi» deıtin teorııany. oqyńyzdarshy, ótinish. Menińshe, keıde biz stýdentterge ózimiz «Osylaı jasaýǵa bolady» dep kórsetetin sııaqtymyz. Sondyqtan osy faktiler týraly jazǵanda detalderin kórsetpeý kerek shyǵar. Osyndaı problemaǵa tap bolǵan otbasylar jeke derekterdi jarııalamaýdy suraıdy, - dedi ol jýrnalıstiń suraǵyna bergen jaýabynda.

Aıtýynsha, atalǵan máselemen quqyq qorǵaý organdary da aınalysyp jatyr.

- Biraq keıingi 3 faktiniń stsenarııi birkelki – bári qulap ólgen. Quddy bir, biz «Osylaı jasaýǵa bolady» dep kórsetip jatqandaımyz. Ǵylym tilinde bul «Verter effektisi» dep atalady, - dedi Aqerke Abylaıhan.

Buǵan deıin Ǵylym jáne joǵary bilim mınıstri Saıasat Nurbek Almatyda bıikten qulaǵan stýdent qyzdyń ólimine sebep bolýy múmkin jaǵdaıdy ataǵan edi.