Mınıstrlik ókili Sáken Bıbosynovqa nege arendalyq páter syılanǵanyn túsindirdi
Týrızm jáne sport mınıstrligi Sport jáne dene shynyqtyrý komıteti tóraǵasynyń orynbasary Aıgúl Bektenova Tokıo olımpıadasynyń qola júldegeri Sáken Bıbosynov ózine syılanǵan páterdi nege 10 jyldan keıin ǵana óz atyna aýdara alatynyn túsindirdi, dep Kazinform.
«Olımpıada júldegerlerine páter berý týraly zań 2014 jyly qabyldanǵan. Al ol páterdi 10 jyl boıy óz atyna aýdarýǵa shekteý qoıatyn norma 2019 jyly engizildi. Páter S.Bıbosynovqa 2021 jyly berildi. Sondyqtan ol páterdi óz atyna 10 jyl ótkennen keıin ǵana aýdara alady», - dedi Aıgúl Bektenova.
Eske salsaq, buǵan deıin boksshy Sáken Bıbosynovqa Túrkistan oblysynan berilgen eki bólmeli páterdiń tóńireginde shý shyqqan bolatyn.
Negizi Olımpıada chempıondary men júldegerlerine turǵynjaı berý erejesi boıynsha, sportshymen aradaǵy shart 10 jyl merzimge jasalady. Shart jasasqan kúnnen bastap 10 jyl ótken soń kórsetiletin qyzmetti alýshylar kommýnaldyq turǵyn úı qorynan berilgen, ózderi turyp jatqan turǵynjaıdy óteýsiz negizde menshikke alady.
Al, sportshy dopıng qoldanǵan nemese paıdalanýǵa áreket jasaǵan jaǵdaıda sporttyq nátıje joıylǵanda, kórsetiletin qyzmetti alýshymen atalǵan qaǵıdalardyń 19 tarmaǵyna sáıkes 10 jylǵa jasalǵan shart buzylady.
