Mınıstrlik Nazarbayev University burynǵy basshysyn sotqa bere me – Saıasat Nurbektiń jaýaby

ASTANA. KAZINFORM – Mınıstrlik Nazarbaev Ýnıversıtetiniń burynǵy basshysy Shıgeo Katsýǵa qarsy shaǵym túsirmeıdi jáne Nazarbaev Ýnıversıtetiniń aryzyna aralaspaıdy. Bul týraly QR Ǵylym jáne joǵary bilim mınıstri Saıasat Nurbek aıtty.

Саясат Нұрбек
Фото: Солтан Жексенбеков/ Kazinform

Úkimette mınıstrge BAQ ókili Nazarbaev Ýnıversıtetiniń burynǵy basshysy Shıgeo Katsýǵa qarsy aryz daıyndap jatqanyn aıta kele, «Ǵylym jáne joǵary bilim mınıstrligi de ony sotqa bere me?» dep surady.

— Birinshiden, Shıgeo Katsýdyń sol kezdegi málimdemesi shyndyqqa saı kelmeıdi. Ekinshiden, álbette, ókinishke qaraı bul elimizdiń repýtatsııasyna nuqsan keltiredi. Úshinshiden, ol málimdeme salmaqty basylymdarda emes, sonsha bir senimge ıe emes aqparat agregatorlarynda jarııalandy. Sebebi salmaqty basylymdardyń bári de faktchekıg jasaıtynyn bilemiz. Sol sebepti NÝ-dyń burynǵy basshysyn sotqa berýi bul sol JOO-nyń jeke sharýasy, óıtkeni olar avtonomdy oqý oryny. Olardyń jumysy jeke zańmen retteledi. Al bizdiń mınıstrlik Katsý myrzany sotqa bergeli jatqan joq. Tıisti kómekti kerek bolǵan jaǵdaıda ýnıversıtetke bere alamyz. Sebebi bul jerde zııan Nazarbaev Ýnıversıtetine tıip jatyr, – dedi ol.

Sondaı-aq, jýrnalıst qazir atalǵan ýnıversıtetke qatysty túrli arandatýshylyqtardyń nege kóbeıip ketkenin surady. Saıasat Nurbek rasynda da, Nazarbaev Ýnıversıtetine aqparattyq shabýyl jasalyp jatqanyn aıtty.

— Bizdiń boljam boıynsha, ony Katsý myrzanyń toby uıymdastyryp otyr. Sebebi ol ketse de, artynda ózi senetin kóp adam qaldy. Soǵysta barlyq ádis jaqsy deıdi ǵoı. Іshki arandatýlar júrip jatyr. Baıqasańyzdar, mundaı jaıttar Katsý myrzanyń belsendiliginen keıin paıda bola bastady. Biz muny eńseremiz dep oılaımyn. Úkimet te, mınıstrlik te Nazarbaev Ýnıversıtetiniń bul sharýasyna aralasa almaıdy, – dedi ol.

Eske sala keteıik, buǵan deıin Nazarbaev ýnıversıtetiniń burynǵy rektory Shıgeo Katsý suhbat berip, ýnıversıtettiń akademııalyq erkindigi men ınstıtýtsıonaldyq derbestigine qaýip tónip turǵanyn málim etken edi.

Onyń aıtýynsha, burynǵy prezıdent ashqan oqý oryndary men uıymdar 2022 jyldan bastap bıliktiń qysymyna ushyraı bastaǵan.

Aıta keteıik, Shıgeo Katsý Kazinform tilshisine Nazarbaev Ýnıversıtetiniń basshylyǵynan ne sebepti ketip jatqanyn aıtqan bolatyn.

 

Сейчас читают