Mınıstrlik medıtsınalyq joǵary oqý oryndaryna túsetinderge qoıylatyn talaptardy kúsheıtti
ASTANA. KAZINFORM — Densaýlyq saqtaý mınıstrligi beıindi vedomstvolarmen birlesip oqýǵa túsýshilerge qoıylatyn talaptardy kúsheıtti.
2025 jyly Qazaqstannyń medıtsınalyq joǵary oqý oryndaryna qabyldaý erejeleri birqatar ózgeriske ushyrady. Memlekettik bilim berý saıasatynyń negizgi baǵyty — bolashaq dárigerlerdi daıarlaý sapasy.
Densaýlyq saqtaý mınıstrligi beıindi vedomstvolarmen birlesip oqýǵa túsýshilerge qoıylatyn talaptardy kúsheıtti, ınfraqurylym men kadrlyq áleýetke baılanysty joǵary oqý oryndarynyń oqý júktemesin teńestirdi, sondaı-aq pedıatrııalyq beıindegi mamandardy daıarlaý múmkindikterin keńeıtti.
Granttyq saıasat
Osy jyly 49 mamandyq boıynsha medıtsınalyq bakalavrıatqa 2700 bilim berý granty bólindi. 2536 oryn ıgerildi, taǵy 131 grant konkýrstyq irikteý qorytyndysy boıynsha talapkerlerdiń arasynda qaıta bólindi. Kvotalar sheńberinde 33 grant berildi: 20 — shetel azamattary úshin jáne 13 — halyqtyń áleýmettik osal toptary úshin.
Kommertsııalyq jınaqty qysqartý
Oqý júktemesin ońtaılandyrý jáne birqatar joǵary oqý ornynda praktıkalyq daıarlyq sapasyn jaqsartý úshin stýdentterdi aqyly negizde qabyldaý qysqartyldy. 2025 jyly ol 4973 talapker boldy.
Ótý balyn arttyrý
2025 jyldan bastap túsý úshin eń tómengi shekti ball 10 tarmaqqa — 70-ke deıin kóterildi. Memlekettik tapsyrys boıynsha túsýshiler úshin eń tómengi deńgeı 100 baldan tómen emes bolyp belgilendi. Eń yntaly jáne talantty stýdentterdi irikteý úshin ishki konkýrstar engizildi. Qazaqstandyq medıtsınalyq JOO-larǵa túsetin shetel azamattary úshin alǵash ret aǵylshyn tilin biletindigin rastaıtyn sertıfıkattyń bolýy mindetti talap engizildi.
Internatýra jáne rezıdentýra
Bıylǵy jyly terapııa, pedıatrııa, hırýrgııa jáne basqa da klınıkalyq pánderdi qamtıtyn ınternatýranyń 6 baǵyty engizildi. Barlyǵy 4356 stýdent bólindi, olardyń jartysyna jýyǵy jalpy praktıka dárigerlerin daıarlaýǵa arnalǵan. Internatýra bolashaq mamandardyń klınıkalyq daǵdylaryn qalyptastyratyn praktıkalyq daıarlyqtyń mindetti kezeńi.
Rezıdentýra deńgeıinde memleket jyl saıyn 2500 grant bóledi. 2025 jyly alǵash ret pedıatrııalyq beıindegi mamandyqtar aýqymy keńeıtildi — 14 jańa baǵyt ashyldy jáne balalar mamandaryn daıarlaý úshin 188 grant bólindi.
Ǵylymı daıarlyq
Magıstratýra jáne PhD doktorantýra baǵdarlamalary boıynsha memleket magıstranttar úshin 325 grant jáne PhD-doktoranttar úshin 160 grant bóldi.
Bilim berý salasyndaǵy ınnovatsııalar densaýlyq saqtaý júıesiniń sapaly kadrlyq rezervin qalyptastyrýǵa, túlekterdiń básekege qabilettiligin arttyrýǵa jáne eldi joǵary kásibı medıtsınalyq kadrlarmen qamtamasyz etýge baǵyttalǵan.
Aıta ketelik Birqatar dárilik zat pen medıtsınalyq qyzmetter qosylǵan qun salyǵynan bosatylady.