Mınıstrlik Mańǵystaý oblysyndaǵy mektep ashanalaryn tekserip jatyr

ASTANA. KAZINFORM – Memleket basshysynyń mektep ashanalarynda balalardyń jappaı ýlanýy faktileri boıynsha tapsyrmasy sheńberinde Densaýlyq saqtaý mınıstrligi Bas prokýratýramen kelise otyryp, Mańǵystaý oblysynyń bilim berý mekemelerinde sanıtarııalyq-epıdemıologııalyq talaptardyń saqtalýyna jospardan tys tekserý júrgizip jatyr.

— Óńirde tekserý úshin barlyǵy 72 nysan aıqyndaldy, búgingi tańda tekserýlermen 14 mektep as blogy qamtyldy. Ýlaný jaǵdaılaryn tergep-tekserý jáne mekteptegi tamaqtanýdyń qaýipsizdigin qamtamasyz etý maqsatynda Oqý-aǵartý, densaýlyq saqtaý mınıstrlikterin, Bas prokýratýrany qosa alǵanda, múddeli organdardyń ókilderinen turatyn vedomstvoaralyq jumys toby quryldy, — delingen Densaýlyq saqtaý mınıstrliginiń habarlamasynda.

Densaýlyq saqtaý mınıstrliginen vedomstvoaralyq jumys tobynyń quramyna Aqtóbe, Jambyl, Qostanaı oblystarynyń, Almaty qalasynyń sanıtarııalyq-epıdemıologııalyq baqylaý departamentterinen jáne DSM «Qoǵamdyq densaýlyq saqtaý ulttyq ortalyǵy» ShJQ RMK Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵynan 7 maman engizildi.

— Mańǵystaý oblysynyń Beıneý aýdanyndaǵy Manash jalpy bilim beretin mektebiniń 12 oqýshysynyń arasynda tamaqtan shyqqan sońǵy toptyq ınfektsııalyq aýrý faktisi boıynsha tergep-tekserý bastalyp, sanıtarııalyq-profılaktıkalyq is-sharalar ótkizý týraly qaýly shyǵarylyp, ákimdiktiń janynan shtab qurylǵan, — delingen habarlamada.  

Aıta ketelik Memleket basshysy Úkimetke jaýapty memlekettik organdarmen birlesip, oqýshylardyń qaýipsizdigin qatań baqylaýǵa alýdy tapsyrǵan edi. 

Mańǵystaý oblysynda balalardyń ýlaný deregine qatysty tekserý bastalǵan edi.