Mınıstrlik MÁMS tólemeıtinderge kólik júrgizýge tyıym salý usynysynan bas tartty

ASTANA. KAZINFORM – Densaýlyq saqtaý mınıstrligi MÁMS tólemeıtinderge kólik júrgizýge tyıym salý tek usynysynan bas tartty. Bul týraly atalǵan vedomstvonyń birinshi vıtse-mınıstri Tımýr Sultanǵazıev aıtty.

«Bul másele qazir kún tártibinde turǵan joq. Qazirgi kezde halyqty medıtsınalyq saqtandyrý júıesine tartýdyń basqa tetikterin qarastyryp jatyrmyz. Onyń ishinde ákimdikter arqyly iske asyrylmaq. Eń aldymen, halyqtyń áleýmettik jaǵynan osal sanattaryna nazar aýdarylǵan», - dedi T.Sultanǵazıev Senattyń jalpy otyrysynan keıin tilshiler suraǵyna jaýap bere otyryp.

Eske salsaq, byltyr kúzde Densaýlyq saqtaý mınıstrligi MÁMS tólemeıtinderge kólik júrgizýge tyıym salý týraly usynys aıtqan edi. 

«Budan basqa, saqtandyrylmaǵan adamdarǵa densaýlyq jáne osy salaǵa qatysty memlekettik qyzmetterdi alý kezinde shekteý engizý usynylady. Máselen, kólik júrgizý, qarý-jaraq saqtaý jáne basqa da baǵyttarda osyndaı shekteýlerdi qarastyrǵan jón dep sanaımyz», - dedi burynǵy mınıstr Ajar Ǵınııat.

Jalpy, 5 jyl boıy medıtsınalyq saqtandyrýǵa qatysty zań talaptary oryndalmaı keledi. 

3 mln adam medıtsınalyq saqtandyrý júıesinen tys qalyp otyr. Osynyń saldarynan adamdar medıtsınalyq kómekti tıisti deńgeıde almaı jatyr

Aýyldardaǵy 1,5 mln adamdy medıtsınalyq saqtandyrý bıýdjet esebinen bolady.