Mınıstrlik qurylǵaly sý zańnamasyn buzý faktilerin anyqtaý kórsetkishi 9 ese ósti
ASTANA. KAZINFORM – Sý resýrstary jáne ırrıgatsııa mınıstrligi qurylǵannan beri sý zańnamasyn buzý faktilerin anyqtaý kórsetkishi 9 ese ósken. Bul týraly vedomstvonyń baspasóz qyzmeti málim etti.
Qazaqstanda Sý resýrstary jáne ırrıgatsııa mınıstrligi qurylǵannan beri sýdyń «kóleńkeli naryǵyna» qarsy kúres kúsheıdi. Memleket basshysynyń tapsyrmalaryn oryndaý aıasynda qabyldanǵan sharalardyń nátıjesinde anyqtalǵan quqyqbuzýshylyqtar sany shamamen 9 esege ósken. 2023 jyly basseın ınspektsııalary sý zańnamasynyń talaptaryn saqtaý boıynsha 105 tekseris júrgizip, nátıjesinde 208 zańbuzýshylyq anyqtaldy. Olardy joıý úshin 81 uıǵarym berilip, jalpy somasy 21,4 mln teńgege 149 ákimshilik aıyppul salyndy. 2024 jyly basseın ınspektsııalary 439 tekseris júrgizip, 1 855 zańbuzýshylyq anyqtady, olar boıynsha 429 uıǵarym berildi. Tekseristerdiń qorytyndysy boıynsha jalpy somasy 48,4 mln teńgege 582 ákimshilik aıyppul salyndy. Al 2025 jyldyń basynan beri 82 tekseris júrgizilip, 141 zańbuzýshylyq tirkeldi. Olar boıynsha 69 uıǵarym berilip, jalpy somasy 24 mln teńgege 254 aıyppul salyndy.
– Byltyr mınıstrliktiń Sý resýrstaryn retteý, qorǵaý jáne paıdalaný jónindegi komıteti quryldy. Onyń negizgi mindeti – sýdy zańsyz paıdalaný men sý esebin burmalaýǵa qarsy kúres júrgizý, sondaı-aq sý nysandaryndaǵy zańsyz áreketterdiń jolyn kesý. Júktelgen mindetterdiń sapaly oryndalýyn qamtamasyz etý úshin qyzmetkerler sanyn arttyrý, aýmaqtyq bólimsheler jelisin keńeıtý jáne basseın ınspektsııalaryn tehnıkalyq jaǵynan jabdyqtaý boıynsha sharalar qabyldandy. Budan bólek, ınspektsııalarǵa baqylaý júrgizý quzyreti berildi, soǵan sáıkes olar jedel áreket etý sharalaryn qoldana alady, – dedi Sý resýrstary jáne ırrıgatsııa mınıstri Nurjan Nurjigitov.
Sýdyń «kóleńkeli naryǵymen» kúresý úshin mınıstrlik qabyldaǵan sharalardyń ishinde sý salasyndaǵy zańbuzýshylyqtar úshin jazany qatańdatý da qarastyrylǵan. Oǵan qosa, bıyl 10 maýsymnan bastap sýarý sýyn paıdalaný erejeleri kúshine endi. Bul erejelerge sáıkes, kelisimshartsyz sý tutynǵany jáne daqyl túrin sý jetkizýshimen kelispeı ózgertkeni úshin ákimshilik jaýapkershilik qarastyrylǵan. Sondaı-aq quqyqbuzýshylyqtardyń aldyn alý maqsatynda túsindirý jumystary da júrgizilip jatyr. Bıyl basseın ınspektsııalary 1 861 sharýashylyq sýbektisin qamtyǵan 125 túsindirý is-sharasyn ótkizdi. Sonyń nátıjesinde sý paıdalanýshylar arnaıy ruqsat qujattaryn belsendi túrde rásimdeı bastady. Osylaısha jyl basynan beri 445 ruqsat qujaty berildi.
Eske sala keteıik, buǵan deıin Sý resýrstary mınıstrligi qurylǵaly 1800-den astam sý mamany turaqty jumyspen qamtylǵanyn jazǵan edik.