Mınıstrlik quqyq qorǵaý organdarymen birlesip, sýdyń «kóleńkeli» naryǵyna qarsy kúres júrgizedi
ASTANA. KAZINFORM — Sý resýrstary jáne ırrıgatsııa mınıstrligi quqyq qorǵaý organdarymen birlesip, sýdyń «kóleńkeli» naryǵyna qarsy kúres júrgizedi. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyndaǵy tapsyrmalardy iske asyrý boıynsha apparat keńesin ótkizdi.
Prezıdenttiń sýdyń «kóleńkeli» naryǵyn joıý jónindegi tapsyrmasyn oryndaý maqsatynda Sý resýrstary jáne ırrıgatsııa mınıstrligi Bas prokýratýra jáne ІІM-men birlesip, respýblıkalyq deńgeıde is-sharalar josparyn ázirleıtin jumys tobyn qurýǵa kelisti. Jumys toby júıeli jedel-analıtıkalyq jumystar júrgizip, reıdtik is-sharalar uıymdastyrady. Tekserýler barysynda zańsyz sý paıdalanýshylar men «Qazsýshar» RMK-daǵy jáne basseın ınspektsııalaryndaǵy qyzmetin adal atqarmaıtyn laýazymdy tulǵalardy anyqtaý kózdelgen.
– Bıyl birqatar mamannyń óz mindetterin oryndamaýy zańsyz sý alýǵa ákelgenin kórsetti. Memleket basshysy halyqqa Joldaýynda quqyq qorǵaý organdaryna naqty tapsyrmalar berdi. Endi bizdiń mınıstrlik sol qurylymdarmen birlesip jumys isteıdi. Barlyǵyna jaýapkershilik bar ekenin eske salamyn. Sý sharýashylyǵy mamandary óz fýnktsıonaldyq mindetterin sapaly oryndaýy úshin mınıstrlik barlyq qajetti jaǵdaıdy jasady. Materıaldyq-tehnıkalyq baza nyǵaıtyldy, jalaqy kóterildi, – dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin vedomstvo basshysy vegetatsııa kezeńi qorytyndysy boıynsha qyzmettik tekserý júrgizýdi tapsyrǵanyn eske sala keteıik. Sýdyń «kóleńkeli» naryǵyna qarsy kúres aıasynda Sýarý sýyn paıdalaný erejelerine, Ákimshilik jáne Sý kodeksterine qosymsha túzetýler ázirlenip jatyr. Bul ózgerister kanaldardan zańsyz sý alýdyń aldyn alýǵa baǵyttalǵan. Sonymen qatar Ulttyq sý resýrstary aqparattyq júıesi bazasynda vegetatsııany tsıfrlyq monıtorıngteý júıesi jasalyp jatyr.
Memleket basshysynyń biryńǵaı tsıfrlyq sý resýrstary platformasyn qurý jónindegi tapsyrmasyn tıimdi iske asyrý úshin ózender men kólderdi túgendeýdi qaıta bastaý josparlanyp otyr. Bul memlekettik sý kadastryn qalyptastyrýǵa múmkindik beredi. Kadastrda jerústi sý resýrstaryn esepteý men baǵalaý júrgiziledi. Bul jumys búkil el kóleminde de, árbir sý sharýashylyǵy basseıni aıasynda da qamtylady.
Memlekettik sý kadastryn Sý resýrstarynyń ulttyq aqparattyq júıesinde júrgizý klımattyq táýekelder jaǵdaıynda negizdelgen sheshimder qabyldaý úshin berik analıtıkalyq baza qalyptastyrady. Sondaı-aq Ortalyq Azııa óńirlik glıatsıologııalyq ortalyǵymen birlesip muzdyqtar katalogyn jasaý jobasy pysyqtalyp jatyr. Sý resýrstaryn esepke alý júıesin uıymdastyrý maqsatynda «Qazsýshar» RMK-nyń «Sý-metrologııa» fılıalyn qaıta qurý jumystary bastaldy. Josparǵa sáıkes fılıal sý paıdalaný esebine qatysty standarttar men talaptardy ázirleýmen, esepke alý júıelerin jobalaý jáne ornatý boıynsha qyzmet kórsetýmen, olardyń tekserisin júrgizýmen jáne qajetti komponentter óndirisimen aınalysady.
– Barlyq vıtse-mınıstrge júzege asyrylyp jatqan jobalar boıynsha keshendi jumys pen monıtorıngti uıymdastyrýdy tapsyramyn. Gıdrotehnıkalyq qurylysjaılardyń aǵymdaǵy jáne kúrdeli jóndeýlerin, sondaı-aq kanaldardy mehanıkalyq tazalaýdy turaqty júrgizý úshin sý sharýashylyǵy nysandaryn paıdalanatyn uıymdardyń materıaldyq-tehnıkalyq bazasyn kúsheıtý qajet. Sonymen birge Prezıdent Joldaýynda aıtylǵan Soltústik Aral teńiziniń kólemin ulǵaıtý jobasy boıynsha tehnıkalyq-ekonomıkalyq qujattamany ázirleýdi aıaqtaý kerek. Islam damý bankiniń nesıesine memlekettik kepil alý máselesin Ulttyq ekonomıka mınıstrligimen jedeldetip qarastyrý qajet,– dep atap ótti Sý resýrstary jáne ırrıgatsııa mınıstri Nurjan Nurjigitov.
Aıta keteıik, Memleket basshysy Joldaý barysynda keıbir kanaldaǵy sýdyń 50-60 paıyzy dalaǵa ketip jatqanyn aıtqan edi.