Mınıstrlik «QazSýSharǵa» Islam Damý bankinen 2,7 mlrd dollar ınvestıtsııa tartpaqshy

ASTANA. KAZINFORM – Sý resýrstary jáne ırrıgatsııa mınıstrligi «QazSýShar» mekemesiniń ırrıgatsııalyq jobalaryna Islam Damý bankinen 2,7 mlrd dollar qaryz almaqshy.

Bul týraly mınıstr Nurjan Nurjigitov vedomstvonyń alqa májilisinen keıin BAQ ókilderine málim etti. 

- Islam damý bankinen birneshe kezeń boıynsha qaryz tartý kózdelgen. Birinshi kezeń boıynsha kelisimshartqa jýyqta otyramyz. Memleket kepildigi rásimdelgennen keıin «QazSýShar» mekemesine 500 mln dollar qaryz bólinedi. Bul aqshaǵa 4 jańa sý qoımasyn soǵyp, 4 qoldanysta bar sý qoımasyn kúrdeli jóndeýden ótkizemiz. Sondaı-aq, jalpy uzyndyǵy 3 myń shaqyrym bolatyn 156 ırrıgatsııalyq júıe bar. Olarǵa kúrdeli jóndeý júrgizip, rekonstrýktsııalaımyz, - dedi ol.

Birinshi kezeń sátti iske assa, jobalardyń ekinshi jáne úshinshi kezeńderine qaryz tartylmaq.

- Jalpy aıtsaq, Islam Damý bankinen 2,7 mlrd dollar qaryz tartýdy josparlap otyrmyz. Biraq bul jospar ǵana, áli maquldanǵan joq. Onyń bári eldegi tozǵan ırrıgatsııalyq júıeni jańǵyrtyp, sý qoımalaryn retteýge jumsalady, - dedi mınıstr.

Sondaı-aq, ol Eýropa qaıta qurý jáne damý bankinen alynǵan qaryzdyń jaǵdaıyna toqtaldy.

- Eýropa qaıta qurý jáne damý bankinen alǵan 60 mlrd teńge 2017 jyldan beri ıgerilip keledi. Búgingi tańda onyń 55 paıyzy ıgerildi. Qalǵan 45 paıyzyn 2025-26 jyly tolyq ıgerip bitiremiz. Bul qaryzdy «QazSýShar» mekemesi tarıf esebinen tólep otyrǵanyn aıta ketý kerek. Ol qarajat Aqtóbe, Jambyl, Túrkistan oblystaryndaǵy ırrıgatsııalyq júıeni jańartyp, betondaýǵa jumsalyp jatyr. Kanaldardy jóndedik, biraq jumys atqaryldy, - dedi vedomstvo basshysy.

Al byltyr kúzde Islam damý banki Qazaqstannyń sý salasyna $1,15 mlrd ınvestıtsııa salatyny aıtylǵan bolatyn.