Mınıstrlik Kárim Másimovtiń záýlim saraıyn basqa memlekettik mekemege berýdi josparlap otyr
ASTANA. KAZINFORM – QR Oqý-aǵartý mınıstrligi burynǵy premer-mınıstr Kárim Másimovke tıesili ǵımaratqa qatysty qabyldanǵan sheshim boıynsha túsinik berdi, dep habarlaıdy Kazinform menshikti tilshisi.
Vedomstvo baspasóz qyzmetiniń habarlaýynsha, jekejaı mınıstrlik balansyna berilgennen keıin ony Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy memlekettik mekemesin ornalastyrý úshin paıdalaný josparlanǵan bolatyn. Ol múmkindigi shekteýli balalarǵa arnalǵan jaǵdaılardy uıymdastyrý, psıhologııalyq-pedagogıkalyq qoldaý jáne mamandandyrylǵan kómek kórsetýge arnalǵan.
Alaıda baǵalaý barysynda ǵımarattyń balalarmen jumys isteý úshin jaramsyz ekeni anyqtaldy.
- Sonymen qatar ǵımarat erekshe bilim berý qajettilikteri bar balalarmen jumys isteıtin uıymdarǵa qoıylatyn sanıtarlyq talaptarǵa saı kelmeıdi jáne kúrdeli jóndeý men qaıta qurýdy, sondaı-aq qajetti materıaldyq-tehnıkalyq resýrstarmen qamtamasyz etýdi qajet etedi, - dep túsindirdi vedomstvo.
Budan basqa, bul aýmaqta estý, kórý, sóıleý, tirek-qımyl apparaty buzylǵan, aqyl-oı kemistigi bar, minez-qulyq, kommýnıkatsııa jáne áleýmettik ózara árekettesý buzylystary bar, sondaı-aq aqyl-oı kemistigi bar múgedek balalardy qosa alǵanda múgedek balalarǵa arnalǵan qosymsha ǵımarat salý qajet bolady. Qazirgi jaǵdaıda nysanda qajetti arnaıy jáne qolaıly jaǵdaılar qurý múmkin emes, dep atap ótti baspasóz qyzmeti.
- Oqý-aǵartý mınıstrliginiń bıýdjetinde kúrdeli jóndeý júrgizý, qaıta qurý, sondaı-aq qosymsha ǵımarat salýǵa qarajat qarastyrylmaǵan. Qazirgi ýaqytta Oqý-aǵartý mınıstrligi memlekettik múlikti basqarý jónindegi ýákiletti organmen birlesip nysandy oǵan muqtaj memlekettik zańdy tulǵalarǵa berý máselesi boıynsha jumys istep jatyr, - dep habarlady mınıstrlik.
Eske sala ketsek, Ulttyq qaýipsizdik komıtetiniń burynǵy tóraǵasy Kárim Másimovke tıesili elordadaǵy záýlim úı 2025 jyldyń 5 qyrkúıeginde Oqý-aǵartý mınıstrliginiń paıdalanýyna berildi.
Aıta ketsek, 2025 jylǵy 10 aqpanda Kárim Másimovtiń Astanadaǵy záýlim saraıy 1,8 mlrd teńgege satylymǵa shyǵarylǵan edi.
