Mınıstrlik fonogrammaǵa tyıym salýdy qoldamaı otyr – depýtat

ASTANA. KAZINFORM – Májilis depýtaty Maqsat Tolyqbaev elimizde fonogrammamen án salýǵa tyıym salý bastamasyn qaıta kóterdi. Onyń aıtýynsha, fonogrammamen án salǵan jaǵdaıda aldymen tyńdarmanǵa eskertý kerek.

- Qoldanystaǵy zań boıynsha fonogrammamen án aıtqan kezde kontsert uıymdastyrýshylary kórermenderdi eskertýge mindetti, ánshi aýzyn jybyrlatyp fonogrammamen aıtady deý kerek. Biraq, bul ereje múldem jumys istemeıdi. Sondyqtan biz bul jobasynda fonogrammamen án salýǵa tyıym salýdy belgileýge baǵyttalǵan túzetýler engizýdi usyndyq, biraq Mádenıet jáne aqparat mınıstrligi qoldamaı otyr, aıtatyn syltaý kóp, óńirlerdegi tehnıkalyq quraldardyń 70%-y tozǵan deıdi. Jaraıdy dep, normany jeńildetip berdik, kontsert zaly tehnıkalyq quraldarmen tolyq qamtamasyz etilse, fonogrammany paıdalanýǵa tyıym salynady dedik, biraq bul norma da ótpeı otyr. Taǵy bir syltaý bilikti dybys rejısserleri jetispeıdi eken, suranys bolmaǵan soń árıne jetispeıdi. Fonogrammany alyp tastasa, eń qymbat gonorardy dybys rejısserleri alady. Odan bólek, taǵy bir jeńildik usyndyq, eger kontsert ótetin oryn jabdyqtalmasa, mysaly, kontsert stadıonda ótse, aýdıtorııany habardar ete otyryp, fonogrammany paıdalanýǵa ruqsat etiledi dedik, buǵan da qarsy bolyp otyrsyzdar, - degen másele kóterdi Maqsat Tolyqbaev Májilistiń jalpy otyrysynda.

Halyq qalaýlysy kótergen fonogramma máselesine qatysty Mádenıet jáne aqparat vıtse-mınıstri Aıbek Sydyqov túsinik berdi.

- Fonogrammaǵa qatysty birneshe jumys tobynyń otyrysy ótti, qyzý talqylanyp jatyr. Memlekettik organ retinde mamandardyń pikirin tyńdap, múddeli jandardyń basyn qosyp, ashyq talqylaý kerek degen mámilege keldik. 11 naýryzda shoý bıznes ókilderi, mádenı mekemeler basshylary, rejısserler jáne basqa mamandarmen sizder usynǵan mehanızmderdi talqylap, egjeı-tegjeıli pysyqtap Májilistegi zań jobasynyń ekinshi oqylymyna deıin bir sheshimge kelemiz degen senimdemin, - dep jaýap berdi mınıstrdiń orynbasary.

Sondaı-aq vıtse-mınıstr fonogrammamen kontsert ótetin kezde kórermenderdi eskertý is júzinde oryndalmaı otyrǵanyn moıyndady.

Eske sala ketsek, elimizde fonogrammany eskertýsiz qoldaný zańmen qadaǵalanatyny 2020 jyldan beri aıtylyp keledi. 

Byltyr Mádenıet jáne aqparat mınıstri Aıda Balaeva fonogrammamen án aıtý, avtorlyq quqyq máselesi zań arqyly retteletinin aıtqan edi. 

Aıta ketsek, búgin Májilis Qazaqstan Respýblıkasynyń keıbir zańnamalyq aktilerine mádenıet jáne bilim berý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.