Mınıstrlik feldsherler máselesin qalaı sheshpek
ASTANA. KAZINFORM — Keıingi kezde elimizde feldsherler tap bolǵan oqıǵalar eldi alańdatyp, atalǵan mamandyq ıeleriniń qyzmetine baılanysty birqatar problemalardyń betin ashyp bergen. Ózderiniń qyzmetine qatysty keıbir túıtkilderdi atalǵan mamandyq ıeleriniń ózderi de aıtyp júr. Endeshe osy máseleler bolashaqta qalaı sheshimin tappaq. Jibek Joly telearnasynyń «Búgin LIVE» baǵdarlamasyna suhbat bergen QR Densaýlyq saqtaý mınıstrliginiń resmı ókili osy máseleler tóńireginde áńgime órbitti.
— Mınıstrliktiń basty qaǵıdasy — turǵyndarǵa jasalatyn medıtsınalyq kómektiń sapasyn arttyrý. Bul qyzmetti atqarý úshin qajetti sharalarmen birinshi medıtsınalyq qyzmetkerler qamtylýy kerek. Sosyn ǵımarattar men qural-jabdyqtar tolyq bolý qajet. Al osy medıtsınalyq kómekti qoljetimdi etetin — osy qyzmetkerlerimiz. Sondyqtan, olardy qoldaý — bizdiń basty basym baǵyttarymyzdyń biri, — deıdi Ásel Qydyralıeva.
Mınıstrlik mamany medıtsına qyzmetkerleriniń ótinishin jan-jaqty qarap, tıisti jumystardy atqaryp jatqanyn jetkizdi.
— Áleýmettik jelilerde aıtylǵandardyń barlyǵyn tyńdadyq. Bul rette jalaqy máselesi birinshi kóterildi. Ekinshisi — medıtsına qyzmetkerlerine jasalatyn shabýyldardyń kóp ekeni. Ondaı jaǵdaılar aýrýhanalardyń qabyldaý bólimderinde de jıi bolady. Qazirgi tańda jedel járdem qyzmeti men ınfektsııalyq aýrýlarmn jumys isteıtin medıtsına mamandarynyń jalaqysyn kóterý máselesi mınıstrlikte qyzý talqylanyp jatyr. Biraq ol bir kúnde bir ǵana mınıstrliktiń sheshimimen shyǵa salmaıdy. Ol biraz ýaqytty qajet etetin protsess. Endi bıýdjettiń múmkindikteri men zańnama aıasynda naqty qandaı mehanızmder bar ekeni qarastyrylyp jatyr, — deıdi spıker.
Al qazir jedel járdemde qyzmet etetin medıtsınalyq qyzmetkerlerdiń qaýipsizdigin qamtamasyz etý úshin pılottyq joba jumys istep jatyr.
— Polıtsııa qyzmetkerlerinde beınejeton bar ǵoı. Dál osy tájirıbeni medıtsına qyzmetkerlerine de qoldanyp kórmekpiz. Qazir Almaty oblysy men Astana qalasynda pılottyq joba júrgizilip jatyr. Ol jaǵdaıdyń qalaı bolǵanyn bastan-aıaq beınetaspaǵa túsirip, qorǵanýǵa, dálel retinde paıdalanýǵa jáne medıtsınalyq kómektiń sapasyn arttyrýǵa kómektesedi. Joba tıimdiligin kórsetse, ár óńirdegi jergilikti atqarýshy organdar qarjylandyrý kózderin qarastyrady. Alaıda bul másele áli sheshilgen joq. Sebebi barlyǵy aldymen qarajatqa kelip tireledi ǵoı, — deıdi DS mınıstrliginiń resmı ókili.
Aıta keteıik, Elordada medıtsınalyq kolledjdegi aýdıtorııaǵa qaza tapqan feldsherdiń esimi beriledi.