Mınıstrlik eskertedi: mýltfılm túrinde usynylatyn zııandy vıdeolar kóbeıdi

ASTANA. KAZINFORM — Áleýmettik jelilerde syrt kózge balalar mýltfılmine uqsaıtyn, biraq mazmunynda jasyryn destrýktıvti aqparat bar beınerolıkter taralyp jatyr. Bul jaıly Oqý-aǵartý mınıstrligi Balalardyń quqyqtaryn qorǵaý komıteti málimdedi.

Áleýmettik jelilerde Brainrot (aýdarmasy — mıdyń shirýi) heshtegimen qysqametrajdy anımatsııalyq rolıkter qarqyndy túrde taralyp jatyr. Uzaqtyǵy — 15–45 sekýnd. Olardyń birinde birneshe ret qaıtalanatyn «trallalero trallaero» (aýdarmasy — Alla — shoshqa) syndy mán‑maǵynasyz kórinetin, alaıda qulaqqa tez sińetin verbaldyq trıggerler qoldanylady. Birqatar rolıkte «bombardıno krokadılo — men Palestınadaǵy balalarǵa bomba tastaǵandy unatamyn» degen fraza astyrtyn dybystyq qabat retinde engizilgen.

Komıtettiń dereginshe, mundaı rolıkter balanyń adamgershilik qundylyqtaryna keri áser etip qana qoımaı, agressıvti minez‑qulyq qalyptastyrýy múmkin.

— Aqparattyq keńistiktegi ózgerister balalardyń psıhoemotsııalyq saýlyǵyna qosymsha qaýip týdyrady, — delingen vedomstvo málimdemesinde.

Osyǵan baılanysty komıtet qazirgi tsıfrlyq jaǵdaıda quqyqtyq bazany jetildirýge baǵyttalǵan usynystar paketin ázirlep, Mádenıet jáne aqparat mınıstrligine, sondaı‑aq Іshki ister mınıstrligine joldady.

Komıtet ata‑analarǵa mynadaı keńes beredi:

— Balanyń qandaı kontent kórip júrgenin jáne kimdermen baılanys ornatyp otyrǵanyn qadaǵalaý;

— Únemi ashyq áńgimelesip, synı oılaý qabiletin damytý;

— Kúmándi vıdeolardy anyqtasa, dereý quzyrly organdarǵa habarlaý.

— Sanaly ata‑ananyń belsendi aralasýy — balanyń tsıfrlyq qaýipsizdiginiń negizgi kepili, — delingen Balalardyń quqyqtaryn qorǵaý komıteti habarlamasynda.

Aıta keteıik, buǵan deıin Qazaqstanda balalardyń quqyǵyn qorǵaıtyn bólek basqarma qurylatyny jaıly jazǵan bolatynbyz.