Mınıstrlik esepke alý quraldary joq munaı bazalaryna shekteý engizýdi josparlap otyr
ASTANA. KAZINFORM — Energetıka mınıstrligi 2026 jylǵy 1 qańtardan bastap baqylaý-ólsheý quraldarymen jabdyqtalmaǵan munaı bazalaryna janarmaıdy jóneltýge shekteýler engizý máselesin qarastyryp otyr.
Energetıka mınıstrligi naryq qatysýshylaryna munaı ónimderiniń aınalymy salasyndaǵy zańnama talaptaryn qatań saqtaý qajettigin eske salady. Naryqtyń ashyqtyǵyn qamtamasyz etý maqsatynda vedomstvo 2026 jylǵy 1 qańtardan bastap baqylaý-ólsheý quraldarymen jabdyqtalmaǵan munaı bazalaryna janarmaıdy jóneltýge shekteýler engizý máselesin qarastyryp otyr.
— Bul talap jańa norma emes. «Munaı ónimderiniń jekelegen túrlerin óndirý jáne olardyń aınalymyn memlekettik retteý týraly» zańǵa sáıkes óndiristik obektilerdi, munaı bazalaryn jáne janarmaı quıý stantsııalaryn esepke alý quraldarymen mindetti túrde jabdyqtaý talaby 2024 jyldan bastap kózdelgen. Qoımalyq bazalardy tsıfrlandyrý — energetıkalyq qaýipsizdiktiń negizgi tetigi bolyp tabylady, ol el boıynsha janarmaıdyń naqty qorlaryn baqylaýǵa, jasandy tapshylyq táýekelderin jáne janar-jaǵarmaıdy «sur» jolmen shetelge shyǵarylýyn boldyrmaýǵa múmkindik beredi, — delingen mınıstrlik habarlamasynda.
Memlekettik OilTrack esepke alý júıesiniń (Qoldau.kz portaly) derekterine sáıkes, búgingi tańda elimizde 279 munaı bazasy tirkelgen. Olardyń 125 nysany tolyqtaı tsıfrlyq jumys formatyna kóship, derekterdi naqty ýaqyt rejıminde berip otyr. Qalǵan nysandardyń ıelerine zań talaptaryna sáıkestik pen úzdiksiz jetkizýdi qamtamasyz etý úshin jańǵyrtý jumystaryn jedeldetý qajet.
— Kóterme naryqty «kóleńkeden» shyǵarý jónindegi sharalar sońǵy tutynýshylarǵa áser etpeıdi. Qajetti jabdyqtarmen qamtamasyz etilgen adal munaı bazalarynyń qoldanystaǵy qýattary ishki naryqty tolyq qamtamasyz etýge jetkilikti. Elde janarmaı qory qajetti kólemde qalyptastyrylǵan, janarmaı quıý stantsııalaryna jetkizý jaǵdaıy turaqty baqylaýda, tapshylyq qaýpi joq, — delingen habarlamada.
Energetıka mınıstrligi bıznes sýbektilerin jańa jylda quqyqtyq alańda turaqty ári ashyq jumys isteýdi qamtamasyz etý úshin óz nysandaryn tehnıkalyq jaraqtandyrýdy ýaqtyly aıaqtaýǵa shaqyrady.
Aıta ketelik munaıdyń álemdik naryǵy: baǵanyń quldyraýy, óndirý kóleminiń artýy jáne 2026 jylǵa boljam týraly jazǵan edik.