Mınıstrlik elimizdegi orman órtteriniń negizgi sebepterin atady
ASTANA. KAZINFORM – Tótenshe jaǵdaılar mınıstrligi orman jáne dala órtteriniń shyǵýy sebebiniń jyl saıynǵy statıstıkasyn jarııalady, dep habarlaıdy QazAqparat tilshisi.
«Jyl saıyn órt qaýipti kezeńde 1 myńǵa jýyq orman órti, sondaı-aq adamdardyń ómirine, olardyń múlkine jáne qorshaǵan ortaǵa qaýip tóndiretin 4 myńǵa tarta dala órti tirkeledi», - delingen Tótenshe jaǵdaılar mınıstrliginiń Kazinform agenttigine bergen jaýabynda.
Ekologııa jáne tabıǵı resýrstar mınıstrliginiń málimetine qaraǵanda, orman órtteriniń jartysynan astamy nemese 61 paıyzy naızaǵaı túskennen bolady. Sonymen qatar, qalyń aǵashtyń janýyna dala órtteri de áser etedi.
«Byltyrǵy órt qaýipti kezeńde taldaý jasalyp, Abaı, Atyraý, Aqtóbe, Jambyl, Batys Qazaqstan, Qyzylorda, Qostanaı, Pavlodar jáne Túrkistan oblystarynda orman jáne dala órtteriniń aıtarlyqtaı óskeni anyqtaldy», - delingen vedomstvo aqparatynda.
Aıta keteıik, bıyldyń ózinde 150-ge jýyq tabıǵı órt tirkeldi.
«Osy jyly jaz ystyq bolýy múmkin, ıaǵnı órttiń shyǵý qaýpi joǵary. Qazirdiń ózinde elimiz boıynsha 27 orman órti jáne 122 dala órti tirkeldi. Olardyń kóbi mınıstrlik kúshteriniń, sonyń ishinde avıatsııanyń qatysýymen aýyzdyqtaldy», - dep atalyp ótken mınıstrlik habarlamasynda.
