Mınıstrlik Dońǵa ken ornyna qatysty daýdy retteý týraly kelisimge qol qoıdy
ASTANA. KAZINFORM – Astanada Dońǵa ken orny boıynsha Ónimdi bólý týraly kelisim (ÓBK) sheńberinde daýly máselelerdi retteý týraly kelisimge qol qoıý rásimi ótti.
Qujatqa QR Energetıka mınıstri Erlan Aqkenjenov pen Dunga Operating GmbH kompanııasynyń bas dırektory Nurjan Ábdirahmanov «PSA» JShS jáne «QazMunaıGaz» UK» AQ ókiletti organdary ókilderiniń qatysýymen qol qoıdy.
Budan ári kelisim konsortsıýmnyń sheteldik seriktesteri – Oman Oil Company Limited jáne PTTEP Corporation kompanııalaryna qol qoıý úshin joldanady. Qol qoıylǵan kelisim taraptar arasyndaǵy merdigerdiń jekelegen tarıhı shyǵyndaryn óteýge qatysty kópjyldyq daýdy retteýdi jolǵa qoıady. Qol jetkizilgen ýaǵdalastyqtar Qazaqstannyń paıdasyna kelisilgen qarjylyq ótemaqy tóleýdi, sondaı-aq aktıvti ıgerýge baǵyttalǵan aýqymdy ınvestıtsııalardy odan ári jalǵastyrýǵa jaǵdaı jasaýdy kózdeıdi.
Energetıka mınıstrligi málimetinshe, daýdyń rettelýi 2026–2039 jyldarǵa arnalǵan ken ornyn ıgerýdiń jańa josparyn iske asyrýǵa múmkindik beredi. Qujatta 67,4 mln barrel munaı óndirý, sondaı-aq, kapıtaldyq jáne operatsııalyq ınvestıtsııalar tartý kózdelgen.
– Dońǵa ken ornynyń áleýeti joǵary jáne eldiń energetıka salasy úshin strategııalyq mańyzǵa ıe. Jobaǵa uzaq ýaqyt boıy jınaqtalǵan ótelmeıtin shyǵystarǵa qatysty daýly máseleler kedergi keltirip keldi. Qol jetkizilgen ýaǵdalastyqtar uzaqqa sozylatyn sot rásimderine júginbeı-aq memlekettiń ekonomıkalyq múddelerin qorǵaýǵa múmkindik beredi jáne jańa ınvestıtsııalyq tsıklge jol ashady. Kelisimge qol qoıý jer qoınaýyn utymdy ári uzaq merzimdi ıgerýdiń negizin qalap, ekonomıkamyzǵa eleýli paıda ákeledi, – dep atap ótti QR Energetıka mınıstri Erlan Aqkenjenov.
Qol qoıylǵan kelisim Qazaqstannyń turaqty ári boljamdy ınvestıtsııalyq ahýaldy qamtamasyz etýge beıildiligin rastaıdy. Qazaqstan tarapy ulttyq basymdyqtar men 1994 jyldan beri elde jumys istep kele jatqan halyqaralyq seriktesterdiń múddelerin eskere otyryp, ózara tıimdi sheshimder qabyldaýǵa múmkindik beretin ashyq jáne syndarly dıalogty ustanady.
«QazMunaıGaz» «Dońǵa» jobasyndaǵy 60% úlesti satyp alǵanyn jazǵan edik.
Investor Mańǵystaýdaǵy Dońǵa ken ornyn ıgerý kelisimin 2039 jylǵa deıin uzartty.
