Darknettegi qazaqstandyqtardyń derekteri: mınıstrlik túsinikteme berdi
ASTANA. KAZINFORM — Qazirgi ýaqytta beıindi qyzmettermen birlesip jarııalanǵan aqparatqa tehnıkalyq tekserý júrgizilip jatyr.
— Mınıstrlik Qazaqstan azamattarynyń derbes derekteriniń taralýy jáne olardyń darknette jarııalanǵany týraly aqparattan habardar.
Qazirgi ýaqytta beıindi qyzmettermen birlesip jarııalanǵan aqparatqa tehnıkalyq tekserý júrgizilip jatyr. Onyń ishinde usynylǵan derekter úlgilerin taldaý jáne olardyń yqtımal shyǵý kózin anyqtaý jumystary júrgizilip jatyr.
Qazirgi tańda elektrondyq úkimettiń aqparattyq júıeleriniń buzylǵany jáne atalǵan derekter bazasynyń tikeleı eGov júıesinen alynǵany týraly rastalǵan aqparat joq, — delingen mınıstrlik habarlamasynda.
Mınıstrliktiń málimetinshe eGov júıesinde jarııalanymdarda kórsetilgen formattaǵy pasporttardyń skan-kóshirmeleri saqtalmaıdy, al tsıfrlyq qujattardyń formaty ózgeshe
— Sonymen qatar jarııalanymdarda kórsetilgen aqparattyń bir bóligi elektrondyq úkimet derekteriniń qurylymy men formatyna sáıkes kelmeıtinin atap ótemiz. Atap aıtqanda, eGov júıesinde jarııalanymdarda kórsetilgen formattaǵy pasporttardyń skan-kóshirmeleri saqtalmaıdy, al tsıfrlyq qujattardyń formaty ózgeshe. Darknet paıdalanýshysynyń derekter bazasynyń shyǵý tegine qatysty málimdemesi eGov júıesiniń buzylǵanyn rastaıtyn dálel bola almaıdy, — delingen Jasandy ıntellekt jáne tsıfrlyq damý mınıstrligi habarlamasynda.
Tehnıkalyq tekserý jalǵasyp jatyr. Onyń qorytyndysy boıynsha qosymsha aqparat beriledi.
— Mınıstrlik azamattarǵa tsıfrlyq qaýipsizdiktiń negizgi talaptaryn saqtaýdy usynady: SMS-kodtardy, parolder men ETsQ derekterin úshinshi tulǵalarǵa bermeý, kúmándi siltemelerge ótpeý jáne ártúrli servıster úshin túrli parolderdi paıdalaný, — delingen habarlamada.
Aıta ketelik adamdardyń jeke derekterin zańsyz paıdalanyp, 2 mlrd teńge nesıe alǵan qylmystyq top ustalǵan edi.
