Mınıstrlik bloger Erbolat Janabylov jarııalaǵan kýrs baǵasy týraly: negizsiz qymbat

ASTANA. KAZINFORM – Búgin Astananyń mamandandyrylǵan aýdanaralyq ákimshilik quqyq buzýshylyqtar jónindegi sotynda mıllıon oqyrmany bar bloger Erbolat Janabylovqa qatysty is qaralyp jatyr.

Sot barysynda Týrızm jáne sport mınıstrliginiń Oıyn bıznesin jáne lotereıany retteý komıtetiniń ókilderi sóz aldy. Іsti sýdıa Malıka Noǵaıbekova qarap jatyr.

Sotta aıtylǵandaı, 2025 jylǵy 21 tamyzda komıtetke azamat Sovetbekovten ótinish túsken, al 22 tamyzda Qarjy monıtorıngi agenttiginen Janabylovtar otbasynyń Instagram akkaýnty arqyly zańsyz lotereıa qyzmetin uıymdastyrý múmkindigi týraly habarlama kelip túsken.

Komıtettiń málimetinshe, blogerlerdiń paraqshasynan belgili bolǵandaı aqsha, on avtomobıl jáne ózge de qundy syılyqtar utystary júıeli túrde ótkizilip, jeńimpazdarǵa tólem jasalǵan. Al zań boıynsha lotereıa operatory emes tulǵalarǵa lotereıa ótkizýge tyıym salynady.

Sondaı-aq Oıyn bıznesin jáne lotereıany retteý komıtetiniń ókilderi blogerler usynǵan kýrs satýdy baqylaý barysynda olardyń málimdemesi jarııalanǵan jarnama mazmunyna saı emestigi anyqtalǵanyn habarlady. Vedomstvo deregine sáıkes, atalǵan kýrs formaldy sıpatqa ıe, praktıkalyq qundylyǵy joq, al olardyń 30 myń teńgelik baǵasy negizsiz qymbat dep tanyldy.

Buǵan deıin habarlaǵanymyzdaı, Astanada bloger Erbolat Janabylovqa qatysty sot otyrysy ótip jatyr. 

Eske sala ketsek, jelide birneshe avtokólik utysyn jarııalaǵan qazaqstandyq blogerler Erbolat Janabylov pen Elmıra Tólegenova áreketin Týrızm jáne sport mınıstrligi nazaryna aldy. Sońynda is sotqa jetken edi. 

Atalǵan jaıtqa qatysty Týrızm jáne sport mınıstri Erbol Myrzabosynov jeke túsinik berdi.