Mınıstrlik bas bapkerdiń áreketine qatysty Fýtbol federatsııasynan túsinikteme berýdi talap etti

ASTANA.KAZINFORM - Kesheli beri áleýmettik jelilerde fýtboldan Qazaqstan ulttyq quramasynyń bas bapkeri Stanıslav Cherchesovtiń qazaq tilin kemsitýge tyrysqany týraly beınematerıal keńinen taralyp, qoǵam tarapynan narazylyq týǵyzdy. QR Týrızm jáne sport mınıstrligi bul jaǵdaıǵa beıjaı qaramaı, Qazaqstan fýtbol federatsııasyna resmı hat joldady.

«Hatta memlekettik tildiń mártebesi Qazaqstan Respýblıkasynyń Konstıtýtsııasy men «Til týraly» Zańyna sáıkes joǵary turatyny jáne oǵan barlyq azamattyń qurmet kórsetýi kerektigi aıtylǵan. Sonymen qatar federatsııadan osy oqıǵaǵa túsinikteme berý jáne S.Cherchesovpen memlekettik tilge qurmet kórsetý týraly túsindirý jumystaryn júrgizý talap etildi. Biz mundaı jaǵdaılardyń qaıtalanbaýyn qamtamasyz etý úshin federatsııa tarapynan tıisti sharalar qoldanylýy kerek dep sanaımyz. Sondaı-aq Qazaqstan fýtbol federatsııasy mınıstrlikke baǵynysty uıym emes ekenin, tıisinshe onyń ishki máselelerine aralasa almaıtynyn, degenmen Qazaqstandaǵy sport saıasatyn qalyptastyryp, júrgizetin vedomstvo bolǵandyqtan, túsinikteme talap etýge quqyly ekenin qaperge salamyz», - delingen mınıstrlik habarlamasynda.

Mınıstrlik osy jazba arqyly elimizdegi ózge federatsııalardy da memlekettik rámizderge, ulttyq qundylyqtarǵa qurmetpen qaraýǵa jáne olarǵa qatysty orynsyz qaljyńnyń aldyn alýǵa shaqyrdy.

Aıta keteıik, Stanıslav Cherchesov bıyl maýsymda fýtboldan Qazaqstan quramasy bas bapkeri qyzmetine taǵaıyndaldy.