Mınıstrlik bala tárbıesine teris áser etetin fılmderdi atady

QR Іshki ister mınıstrligi Ákimshilik polıtsııa komıteti tóraǵasynyń orynbasary Renat Zulqaıyrov balalar men jasóspirimderdiń tárbıesine keri áser etip jatqan fılmder men serıaldardy atady, dep habarlaıdy Kazinform.

«Qoǵamda jańa syn-qaterler men talaptar paıda bolyp jatqanyn moıyndaýymyz kerek. Eresekter negizinen aqsha tabýmen basy qatyp júrgende, bala tárbıesine ýaqyt qalmaıdy. Balalar táýlik boıy ınternetti, áleýmettik jelilerdi qarap otyrady. Munda eń tanymal kontent retinde birinshi orynǵa zorlyq-zombylyq, dórekilik pen túrli prankter shyǵyp otyr. Sonymen qatar, keıingi kezderi kámeletke tolmaǵandardyń minez-qulqyna «Chernyı dvor», «Patsanskaıa ıstorııa», «Taraz», «Slovo patsana» sııaqty tanymal fılmder keri áser etip jatyr», - dedi R. Zulqaıyrov Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý máselesin talqylaý kezinde.

Bul turǵyda ol polıtsııa qyzmetkerleri Oqý-aǵartý mınıstrligimen birlese otyryp, osy fılmder men serıaldardyń keıipkerlerin mysalǵa alyp, qylmystyq ómirdiń teris saldaryn túsindirip jatqanyn aıtty.

«Biraq bul is-sharalar jetkiliksiz. Jergilikti jerlerde ıdeologııa jetispeıdi, ekranda úlgi alatyn keıipkerler tapshy», – dep tolyqtyrdy Renat Zulqaıyrov.

Budan buryn habarlanǵandaı, Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý taqyrybyndaǵy jıynda depýtat Nurlan Beknazarov sot statıstıkasy bala tárbıesine baılanysty máselelerdiń óte ózekti ekenin kórsetip otyrǵanyn aıtty.