Mınıstrlik: Áıgili saýndtrekter kontsertin uıymdastyrý úshin ruqsat alýdyń qajeti joq

ASTANA. KAZINFORM – Mádenıet jáne aqparat mınıstrligi Kazinform elde kıno, mýltfılm, teletoptama saýndtrekterinen kontsert uıymdastyrýdyń tártibi týarly málimet berdi.

Qazir Astana, Almaty sııaqty qalalarda áıgili kınotýyndylardyń saýndtrekterinen kontsert uıymdastyrý sánge aınalyp keledi. Keıbir sarapshylar bul kontsertti uıymdastyrýshylar halyqaralyq avtorlyq quqyq talaptaryn saqtaı bermeıtinin aıtady.

- Kıno, mýltfılm, teletoptama saýndtrekterinen uıymdastyrylatyn kontsertter kommertsııalyq jobalar bolyp esepteledi. Sonymen qatar, Qazaqstanda atalǵan jobalardy ótkizý úshin lıtsenzııa alý, resmı tirkeý qoldanylmaıdy. Atalǵan jobalardy ótkizý kezinde uıymdastyrýshylar QR Avtorlyq quqyq jáne (nemese) sabaqtas quqyqtar týraly zańyn eskerý qajet. Sondaı-aq, ýákiletti organ kommertsııalyq kontsertterdi ótkizip uıymdastyrýy úshin ruqsat bermeıdi, - dep jazylǵan jaýapta.

Eske salsaq, «B. Qaldaıaqovanyń Shámshi álemi» qorynyń atqarýshy dırektory Botagóz Qaldaıaqova álemge áıgili saýndtrekterdiń kontsertin uıymdastyrýshylar Qazaqstandy halyqaralyq daýǵa dýshar etý múmkin ekenin aıtqan edi. 

«Ǵalamat ǵasyr: Súleımen sultan» serıalynyń saýndrekteri degen sııaqty kontsertter qaptap ketti ǵoı. Sony ótkizip júrgenderdiń eshqaısysy álem juldyzdaryna, oryndaýshylarǵa avtorlyq syıaqy tólep jatqan joq. Onyń bári «pırattyq kontent». Sheteldik avtorlar óz elinen bizge shaǵym túsirse, asa iri halyqaralyq daý bolady», - deıdi sarapshy.

Aıta ketsek, Ádilet vıtse-mınıstri Botagóz Jaqselekova Almatyda avtorlyq qoǵam ókilderimen kezdesip, avtorlyq quqyq máselesine memlekettik monopolııa engizý usynysy týraly máselelerdi talqylaǵan bolatyn.