Mınıstrlik aspandaǵy beımálim nysandardyń paıda bolý sebebin atady
ASTANA. KAZINFORM - Tsıfrlyq damý, ınnovatsııalar jáne aeroǵarysh ónerkásibi mınıstrligi 5-nen 6 maýsymǵa qaraǵan túni Ortalyq jáne Soltústik Qazaqstan halqy, onyń ishinde Astana, Qaraǵandy, Pavlodar jáne Qostanaı qalalarynda paıda bolǵan jaryq qubylysqa qatysty túsinikteme berdi.
— 5-nen 6 maýsymǵa qaraǵan túni Ortalyq jáne Soltústik Qazaqstan halqy, onyń ishinde Astana, Qaraǵandy, Pavlodar jáne Qostanaı qalalarynyń turǵyndary aspanda jaryq qubylysty baıqady. Aldyn ala málimetter boıynsha, bul orbıtada buryn bolǵan ǵarysh nysandarynyń biriniń atmosferaǵa enýimen baılanysty, — delingen Tsıfrlyq damý, ınnovatsııalar jáne aeroǵarysh ónerkásibi mınıstrligi habarlamasynda.
Ǵaryshtyq qaldyqtardyń qozǵalysyn baqylaıtyn halyqaralyq uıymdardyń derekterine sáıkes, dál osy ýaqyt aralyǵynda úsh oqıǵa tirkelgen, olardyń árqaısysy baıqalǵan qubylysty týdyrýy múmkin.
1. Qytaıdyń ZQ-2E zymyranynyń údetkish blogy
Atmosferaǵa ený ýaqyty: 5 maýsym, Astana ýaqytymen shamamen 22:40
Nysan: LandSpace kompanııasy 17 mamyrda ushyrǵan Zhuque-2 Enhanced zymyranynyń satysy
Ereksheligi: Ekologııalyq taza otyn (suıyq metan men ottegi) paıdalanylady, janý kezinde aıqyn jaryq shyǵarady.
Bul nysan ýaqyt jaǵynan jáne kórinis sıpattamasy boıynsha Qazaqstan turǵyndarynyń baıqaǵan qubylysyna eń dál sáıkes keledi.
2. STARLINK-1631 (SpaceX) spýtnıgi
Atmosferaǵa ený ýaqyty: 6 maýsym, Almaty ýaqytymen 03:41
Eski spýtnıkterdiń biriniń josparly orbıtadan shyǵýy
3. Japondyq H-2A R/B zymyranynyń údetkish blogy
Atmosferaǵa ený ýaqyty: 6 maýsym, Almaty ýaqytymen 00:36
Nysan passıvti orbıtadan shyǵý rejıminde bolǵan
— Qazirgi tańda Qazaqstan Respýblıkasy aýmaǵyna qandaı da bir fragmentterdiń qulaǵany nemese zalal keltirgeni týraly rastalǵan aqparat joq. Mundaı nysandar, ádette, atmosferada tolyq janyp ketedi (iri bólikterdiń Qazaqstan aýmaǵyna qulaýy ekitalaı), al qubylystyń ózi kórneki bolǵanymen, qaýipsiz úderis bolyp sanalady. Azamattardan sabyr saqtap, tek resmı aqparat kózderine senýdi suraımyz, — delingen habarlamada.
Aıta ketelik belgisiz nysandar Astana aspanynda ushyp ótkeni týraly jazǵan edik.