Mınıstrlik áleýmettik jelidegi zańsyz utys oıyndaryna qatysty tekseris bastady
ASTANA. KAZINFORM — Týrızm jáne sport mınıstrliginiń baspasóz qyzmeti Instagram áleýmettik jelisindegi «Zhanabylov_e» jáne «elt6i» akkaýnttarynda ótkizilgen baǵaly syılyqtardy utysqa salýǵa qatysty túsinikteme berdi.
QR TSM janyndaǵy qumar oıyndar men lotereıa qyzmetin retteý komıtetine azamat S.-dan joǵaryda kórsetilgen blogerler uıymdastyrǵan baǵaly syılyqtardy utysqa salýdyń lotereıa qyzmeti týraly zańnama talaptaryna sáıkestigin tekserý jóninde ótinish kelip tústi.
— Qazirgi ýaqytta azamat Janabylovqa ÁQBtK-niń 743-babynyń 1-bóligine sáıkes túsinikteme berý qajettiligi týraly habarlama joldandy, onyń nátıjeleri boıynsha ákimshilik is qozǵaý máselesi qaralatyn bolady.
Túsinikteme bolmaǵan jaǵdaıda, Komıtet ÁQBtK-niń 445-1-babynyń 6-bóligi boıynsha ákimshilik quqyqbuzýshylyq týraly is qozǵaıdy (jeke tulǵalarǵa — júz, shaǵyn kásipkerlik sýbektilerine nemese kommertsııalyq emes uıymdarǵa — úsh júz, orta kásipkerlik sýbektilerine — bes júz, iri kásipkerlik sýbektilerine — bir myń aılyq eseptik kórsetkish mólsherinde aıyppul salynady). Azamat kelmegen jaǵdaıda is syrttaı qaralady, — delingen mınıstrlik habarlamasynda.
Eske salamyz, Qazaqstan Respýblıkasynyń «Lotereıalar jáne lotereıa qyzmeti týraly» Zańynyń 5-babynyń 4 jáne 5-tarmaqtaryna sáıkes lotereıa operatory nemese lotereıa taratýshysy (agenti) bolyp tabylmaıtyn tulǵalardyń lotereıa ótkizýine jáne lotereıa bıletterin, elektrondyq lotereıa bıletterin taratýlaryna (satýlaryna) tyıym salynady.
Azamattardy áleýmettik jelilerde resmı lotereıa uıymdastyrýshylary bolyp tabylmaıtyn tulǵalar ótkizetin kúmándi utys oıyndaryna, «gıvterge» jáne ózge de is-sharalarǵa qatyspaı, qyraǵylyq tanytýǵa shaqyramyz. Bul qarjylyq shyǵynǵa ushyraýdan jáne alaıaqtyqtyń qurbany bolýdan saqtaıdy.
Aıta ketelik Astanada daýly vıdeo jarııalaǵan tanymal bloger qamaýǵa alynǵan edi.