Mınıstrlik aqyly olımpıadalarǵa qatysty ustanymyn túsindirdi

ASTANA. KAZINFORM – Jeke uıymdar uıymdastyratyn aqyly olımpıadalarǵa qatysty ata-analar men pedagogter arasynda ártúrli pikir qalyptasqan. Jýrnalıster tarapynan qoıylǵan «Nelikten keıbir mektep muǵalimderi aqyly olımpıadalarǵa qatysýǵa úgitteıdi?» degen suraqqa QR Oqý-aǵartý mınıstrligi Orta bilim komıtetiniń tóraǵasy Qanybek Jumashev jaýap berdi.

Komıtet tóraǵasynyń aıtýynsha, mınıstrlik arnaıy buıryqpen bekitilgen olımpıadalar tizimin qalyptastyrǵan. Bul tizimge respýblıkalyq bıýdjet esebinen qarjylandyrylatyn, Qazaqstan aýmaǵynda ótkizilip, jetkilikti abyroı men reıtıngke ıe bolǵan olımpıadalar kiredi.

— Biz bilim salasynda ádildik pen ashyqtyqtyń bolǵanyn qalaımyz. Resmı tizimde bar olımpıadalar ǵana memleket tarapynan qoldaý tabady. Alaıda biz jeke uıymdardyń da olımpıada ótkizýge talpynyp jatqanyn kórip otyrmyz. Olar jarnama jasaý arqyly mektep muǵalimderi men oqýshylardy tartýǵa tyrysady. Keıbiri tipti balalardy ata-anasynyń esebinen shetelge aparyp, túrli baıqaýlarǵa qatystyrady, — dedi Qanybek Jumashev.

Onyń aıtýynsha, mınıstrlik eshbir jeke bastamany shektemeıdi, degenmen resmı túrde tanylǵan bilim jarystarynyń naqty tizimi bar, jáne soǵan ǵana memlekettik qoldaý kórsetiledi.

— Biz naqty ustanymdamyz barlyq olımpıadalar ashyq formatta ótýi tıis. Biraq mınıstrlik tek buıryqpen bekitilgen bilim saıystaryna ǵana jaýapty. Jekelegen uıymdardyń bastamasyna shekteý qoıa almaımyz, — dedi komıtet basshysy.

Buǵan deıin Qazaqstandyq jasóspirimder Eýropalyq olımpıadada baq synap júrgenin jazǵanbyz.