Mınıstrlik 21 myń uıym men 275 myń medıtsına qyzmetkerin biryńǵaı tsıfrlyq kontýrǵa biriktirdi
ASTANA. KAZINFORM – Qazaqstanda densaýlyq saqtaýdyń biryńǵaı tsıfrlyq kontýryn qalyptastyrý jumystary jalǵasyp jatyr. Búginde biryńǵaı júıede 21,3 myń medıtsınalyq uıym, 275 myń medıtsına qyzmetkeri jáne 141 myńnan astam medıtsınalyq tehnıka birligi týraly derekter jınaqtalǵan.
Bul týraly Densaýlyq saqtaý mınıstrligine qarasty Respýblıkalyq elektrondyq densaýlyq saqtaý ortalyǵynyń bas dırektory Nurshat Sarybek Densaýlyq saqtaý mınıstrliginiń alqa otyrysynda málimdedi.
– Biz bytyrańqy avtomattandyrý kezeńinen densaýlyq saqtaýdyń biryńǵaı tsıfrlyq ekojúıesin qurýǵa kóshtik. Búginde salany basqarý qaǵıdattaryn túbegeıli ózgertetin asa mańyzdy platformalardyń engizilý nátıjelerin kórip otyrmyz, – dedi N.Sarybek.
1S júıelerimen jáne kadrlyq tizilimdermen júrgizilgen tsıfrlyq ıntegratsııanyń nátıjesinde derekterdi qolmen engizý úlesi 0%-ǵa deıin tómendep, medıtsına qyzmetkerlerine túsetin ákimshilik júkteme 30–40%-ǵa qysqardy.
– Biz 21 300-den astam medıtsınalyq uıym men 275 000 qyzmetker týraly aqparatty biryńǵaı kontýrǵa biriktirý arqyly derekterdiń shashyrańqylyǵyn joıdyq, – dep atap ótti REDSO basshysy.
Densaýlyq saqtaýdy tsıfrlandyrýdyń negizgi baǵyttarynyń biri áıelder men balalardyń densaýlyǵyn monıtorıngileý júıesi boldy. Qazirgi ýaqytta tsıfrlyq beıinmen 6,8 mln bala men 4,8 mln áıel qamtylǵan, al monıtorıng 80 mańyzdy kórsetkish boıynsha júrgiziledi. Júkti áıeldiń aıyrbastaý kartasy endi eGov Mobile qosymshasy arqyly qoljetimdi.
Sondaı-aq patsıentterdi dınamıkalyq baqylaýdyń jańa formaty engizilip jatyr. Búginde tsıfrlyq monıtorıng aıasynda 3,6 mln adam qamtylǵan. «Tsıfrlyq baqylaý kartasy» dárigerge patsıenttiń qaı óńirde júgingenine qaramastan, onyń emdeýge jatqyzylý tarıhyn, taǵaıyndaýlaryn jáne retseptterin kórýge múmkindik beredi. ️
Ambýlatorııalyq dári-dármekpen qamtamasyz etý salasynda dárilik zattardy derbestendirilgen josparlaý júıesi engizildi. Qazirgi tańda ol 1,9 mln patsıent pen 683 medıtsınalyq uıymdy qamtıdy. 2026 jylǵa arnalǵan josparlaý kólemi 330,9 mlrd teńge boldy. Tańbalaý kodtarynyń engizilýi dárilik preparattardyń qaldyqtaryn onlaın baqylaýǵa jáne olardyń qozǵalysyn tolyq qadaǵalaýǵa múmkindik berdi.
– Biz dárilik zattardy josparlaýdyń túbegeıli jańa modelin iske qostyq. Endi josparlaý ortasha normatıvterge emes, naqty patsıenttiń qajettiligine negizdeledi, – dedi respýblıkalyq ortalyq basshysy.
Tsıfrlyq transformatsııanyń kelesi kezeńi dárigerlerdi biryńǵaı ınterfeıspen jáne jasandy ıntellekt kómekshisimen qamtamasyz etetin Biryńǵaı memlekettik medıtsınalyq aqparattyq júıeni (BMMAJ) iske qosý bolmaq. Jobanyń sheńberinde 1 900-den astam medıtsınalyq uıymdy qosý jáne jekemenshik medıtsınalyq aqparattyq júıelerden biryńǵaı memlekettik platformaǵa kezeń-kezeńimen kóshý josparlanyp otyr.
Densaýlyq saqtaý mınıstri Aqmaral Álnazarova óńirlerge júıelerdi arhıvtik derektermen qysqa merzimde tolyqtyrýdy, sondaı-aq biryńǵaı derekter qoımasy men perspektıvalyq júıelerdegi málimetterdi turaqty paıdalaný men ózektendirýdi qamtamasyz etýdi tapsyrdy. Sonymen qatar vedomstvo basshysy «RBJ» aqparattyq júıesindegi jyljymaıtyn múlik nysandary týraly málimetterdiń tolyq ózektiligi men durystyǵyn qamtamasyz etý, eńbek resýrstary teńgerimin obektıvti qalyptastyrý úshin kadrlyq derekterdi verıfıkatsııalaý, sondaı-aq qarjylyq jáne salalyq aqparattyq júıelerdiń arasyndaǵy derekterdi sınhrondaýdy aıaqtaý qajettigin atap ótti. ️
Medıtsınalyq kómektiń sapasy men qaýipsizdigi máselelerine erekshe nazar aýdarý tapsyryldy. Osyǵan baılanysty medıtsınalyq qyzmetke personaldy jiberý tártibine baqylaýdy kúsheıtý júkteldi.
